Innocentius episcopus, servus servorum Dei, venerabili fratri ... episcopo et dilectis filiis ... preposito Vesprimiensi et ... archidiacono Albensi Vesprimiensis diocesis, salutem et apostolicam benedictionem. Dilecti filii ... abbas et conventus Sancti Martini de Pannonia nobis conquerendo monstrarunt, quod venerabilis frater noster ... Strigoniensis archiepiscopus predia et homines villarum spectantium ad capellam Sancte Marie in Sala, que ad eorum monasterium noscitur pertinere, decimarum pretextu ad eundem archiepiscopum non spectantium annis singulis depredatur, in hiis et aliis ipsis iniuriosus et molestus existens, propter quod iidem ad nostram audientiam appellarunt. Quocirca discretioni vestre per apostolica scripta mandamus, quatinus partibus convocatis audiatis hinc inde proposita, et usque ad diffinitive sententie calculum appellatione remota procedentes causam ipsam sufficienter instructam ad nostram presentiam remittatis, assignato partibus termino competenti, quo se nostro conspectui representent, iustam auctore domino sententiam recepture. Quod si non omnes hiis exequendis potueritis interesse, tu ea frater episcope cum eorum altero nichilominus exequaris. Tu denique frater episcope super te ipso et credito tibi grege taliter vigilare procures extirpando vitia et plantando virtutes, ut in novissimo districti examinis die coram tremendo iudice, qui reddet unicuique secundum opera sua, dignam possis reddere rationem. Datum Rome apud Sanctum Petrum III. Nonas Maii, pontificatus nostri anno septimo decimo. [1214. máj. 5.]