Fridreich etc. Ersamen geistlichen, lieben anda^echtigen! Als die allerdurchleuchtigist fu^erstin fraw Leonara, Romische kayserin etc., unser liebe gema^ehel, ir bette fu^er den erbergen unsern lieben anda^echtigem Wolfgang Aw^epach umb die negstledig goczgab oder pfruendt ewr geistlichen lehenschafft an euch gewendet hat inhalt desselben iers kaiserleichen briefs ew darumb geantwurt und darauf ewer guetwillig zuesagung irrer lieb zu danchk zuegeschriben habn, also begern wir ew mit sunderm vleisse bittende, ir wellet die benant unser lieb gema^ehel in solchem iren gepette vor allen andern, dafur wir oder ander icht gepetten heten oder noch bitten wurden, umb unsern willen geweren und denselben Wolfgang darinnen vorgannchk lassen haben. Daran etc. Geben zu der Newenstat am erichtag vor exaltacio sancte crucis anno domini etc. LXIIII, unsers kaysertumbs im drewczehennden jaren.

Source Fulltext: FUCHS, Göttweig II (=FRA II/52, Wien 1901) S. 608