Uenerabilibus uiris W dei gracia abbati de Tama et priori de Abbendona et magistro T de Wateleia Gilebertus Basset salutem Sciatis me audiuisse quod Prior et canonici de sancta Fridaswitha ponunt in placitum coram uobis canonicos de Oseneia super ecclesia sancte Marie Magdalene extra portam de Oxneford[] sed quia eadem ecclesia spectat ad ecclesiam sancti Georgii que est capella de castello domini regis et si canonici de sancta Fridaswitha possent predictam ecclesiam dirationare uel seisinam eiusdem ecclesie optinere capella ipsa demembraretur et sustineret dominus rex et balliui eius magnam iacturam et dampnum de seruicio suo in prefata ecclesia sancti Georgii cuius luminaria et uicarii sub certo num[er]o assignati prefata ecclesia beate Marie Magdalene et aliis pertinenciis sustentantur item quia dominus rex utramque ecclesiam prenominatis canonicis de Oseneia propter cartam suam et suorum antecessorum debet warantizare et ad eum pertinet libertates predictarum ecclesiarum et iura integre conseruare ideo pro libertate et pertinenciis utriusque ecclesie in predicta causa ad dominum papam appelo et etiam presentium latorem R de Bisel[] ad appelandum coram uobis procuratorem facio Ualete et tantum faciatis ut domino regi debitum honorem deferatis

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.