Omnibus sanctae matris ecclesiae filiis ad quos praesentes literae pervenerint Willelmus Heued Willelmus Delbogh Walterus Jop Robertus Godiheld Gilibertus de Malmysbure sutor Johannes Walkelin Alicia relicta quondam Levenath Nicholaus pistor necnon universi et singuli homines in nova terra de Marleberga messuagia et mansiones tenentes et habentes salutem in Domino sempiternam Noverit universitas vestra nos Dei intuitu et pro nostrarum salute animarum et praecipue ad honorem confessoris gloriosi beati Martini in cujus nomine quandam capellam ereximus pro nobis et haeredibus nostris unanimi voluntate firmiter constituisse et praesentis scripturae testimonio nos obligasse quod futuris et perpetuis temporibus ad sustentationem unius capellani qui in dicta Capella nobis et haeredibus nostris divina celebrabit voluntate et consensu expresso rectoris ecclesiae de Preshut super hoc introvenientibus et prius requisitis dabimus et ad quatuor anni terminos per manus dicti rectoris quadraginta solidos sine omni contradictione persolvemus scilicet ad festum S Michaelis decem solidos ad Natale Domini decem solidos ad Pascha decem solidos et ad festum S Johannis Baptistae decem solidos subjicientes etiam nos et haeredes nostros jurisdictioni et coercioni domini Sarum episcopi qui pro tempore fuerit quatenus liceret ei ad praedictorum observationem de plano et absque strepitu judiciali quotiens opus fuerit nos et haeredes nostros per omne genus censurae ecclesiasticae coercere Et ut haec nostra donatio et concessio pro nobis et haeredibus nostris perpetuae firmitatis robur obtineat una cum signo patris venerabilis domini Willelmi Dei gratia Sarum episcopi nostro sigillo communi praesens scriptum confirmavimus Actum die Veneris proxima ante festum S Petri ad Vincula anno gratia m cc liv

Source Fulltext: Charters and Documents Illustrating the Cathedral, City and Diocese of Salisbury. Dunn McCray. Rerum Britannicarum Medii Aevi Scriptores, 97. H.M.S.O. Eyre and Spottiswoode. London. 1891.