Notum sit cunctis fidelibus quod anno gratie millesimo ducentesimo quadragesimo nono ad festum Assumptionis beate uirginis ita conuenit inter dominum A abbatem et conuentum de Oseneya ex una parte et Willelmum de Glouernia et Emmam uxorem eius ex altera uidelicet quod ambe partes inuicem consenserunt et concesserunt quod murus qui diuidit terram abbatis et conuentus quam idem habent ex dono Aaliz filie Radulfi de Salle in parochia sancti Edwardi ad orientem ecclesie eiusdem sancti et terram dictorum Willelmi et Emme que est ex parte australi illius terre sit communis inter easdem partes ita quod abbas et conuentus facient leuare dictum murum in altitudine nouem pedum ad custum suum tantum hac uice siue de lapidibus siue de terra scilicet ad uoluntatem abbatis et conuentus Processu uero temporis quandocunque et quotienscunque necesse fuerit ut dictus murus emendetur uel omnino de nouo reparetur concessum est et prouisum ut emendetur uel reparetur ad custum utriusque partis prouisum est nichilominus et concessum ut dicti abbas et conuentus possint edificare coquinam uel stabulum in extrema orientali parte illius muri scilicet usque ad fontem qui est communis inter predictas partes ita quod totus locus inter fontem et aulam stet uacuus sine edifitiis ex utraque parte prouisum est nichilominus et concessum quod non licebit aliquo tempore alicui partium edificare super predictum murum in aliqua sui parte aliter quam dictum est Item prouisum est inter partes et concessum quod ipsi Canonici prosternent gablum quod est inter domum eorum et domum dictorum Willelmi et Emme uersus austrum et leuabunt nouum gablum quod partibus commune erit ad custum suum cum una archa uel duabus si eis placet in eodem loco Quod si aliquo tempore necesse fuerit dictum gablum emendare uel de nouo reparare emendabitur et reparabitur ad custum utrarumque partium Ad hec omnia fideliter obseruanda dicti Willelmus et Emma uxor eius pro se et heredibus suis in manu domini Rogeri prioris de Oseneya affidauerunt Pro hac autem conuentione et concessione dederunt dicti abbas et conuentus prefatis Willelmo et Emme unam marcam argenti et in huius [...] hiis testibus Nicholao de Stokwelle tunc maiore Oxon Petro filio Thoraldi Waltero Aurifabro Laurentio filio Widonis Henrico Perle et Thoma Speciario tunc prepositis Iohanne Rufo Waltero de Oseneya Henrico Purcel Britio de Aula et aliis

Source Fulltext: Cartulary of Oseney Abbey. H. E. Salter. Oxford Historical Society, V.89. Oxford Historical Society. Clarendon Press. Oxford. 1929.