Memorandum quod anno Domini mccl tercio in crastino sancti Nicholai lis mota inter Robertum uicarium sancti Petri ad orientem per quandam generalem literam apostolicam cuius tenor subscribitur ex parte una et fratrem Th[omam] custodem hospitalis sancti Iohannis extra portam orientalem Oxonie et eiusdem loci fratres ex altera uidelicet cum petite essent decime molendini ad equos siti infra eorum septa et cuiusdam pratelli iuxta eorum uirgultum et cum petita esset medietas cuiusdam domus que sita est in uico sancti Iohannis iuxta domum magistri Valteri quondam officialis Oxonie et etiam decime ab Andrea Halegod eorum familiari similiter essent petite dictus R renunciauit omnibus petitis in libello conuentionali contentis signato signo prioris de Cruce Roys et signo sui precentoris commissarii prioris sancti Neoti iudicis a sede apostolica delegati ad diem Renunciauit eciam dictus R specialiter et generaliter omnibus inpetratis et inpetrandis super petitis renunciando omni excepcioni cauillacioni priuilegio fori et omni iuris remedio tam canonici quam ciuilis et maxime regie prohibicioni exceptis quatuor solidis ecclesie sancti Petri debitis de quodam tumulo Consimiliter renunciauerunt dicti custos et fratres omni actioni quam habuerunt contra dictum R coram eorum conseruatoribus occasione inhibitionis et citationis eidem facte per decanum Oxonie super dampnis iniuriis et uiolenciis necnon et super expensis in lite factis et sic partes sicut dictum est renunciauerunt omni iuris remedio hinc inde super prenominatis exceptis illis que in priori cirographo inter eosdem confecto continentur que fideliter in posterum obseruentur et ad istam conuentionem fideliter obseruandam sine fraude et dolo utraque pars iuramento prout decet sacerdotes corporaliter hinc inde prestito promisit et subiecerunt se partes iurisdiccioni et cohercioni cancellarii Oxonie qui pro tempore fuerit ad compellendum partem contra compositionem istam uenientem per sentenciam suspensionis [uel] excommunicationis de die in diem absque strepitu iudiciali quousque dicta composicio plenarie obseruetur sed saluis in omnibus priuilegiis dictorum fratrum optentis et optinendis In cuius rei testimonium partes conseruatores [et] cancellarius Oxonie huic scripto in modum cirographi confecto signa sua alternatim apposuerunt ` Innocencius episcopus seruus seruorum dei dilectis filiis de Cruce Roys et de sancto Neoto prioribus Lincolniensis [et] Londoniensis dioc[esum] salutem et apostolicam benedictionem Conquestus est nobis Robertus perpetuus uicarius ecclesie sancti Petri ad orientem Oxonie quod prior et conuentus de Scirburne Willelmus rector ecclesie de Haseley Andreas Halegod et quidam alii clerici et laici Lincolniensis Sarebur[iensis] Londoniensis ciuitatum et dioc[esum] ipsum indebitis exactionibus agrauantes super decimis redditibus terris debitis et rebus aliis iniuriantur eidem ideoque discrecioni uestre per apostolica scripta mandamus quatinus partibus conuocatis audiatis causam et appellatione remota usuris cessantibus fine debito decidatis facientes quod decreueritis per censuram ecclesiasticam firmiter obseruari testes autem qui fuerint nominati si se gracia odio uel timore subtraxerint censura simili appellatione remota cogatis ueritati testimonium perhibere Datum Perusii v idus Octobris pontificatus nostri anno decimo

Source Fulltext: Cartulary of the Hospital of St. John the Baptist. H. E. Salter. Oxford Historical Society, V.66. Oxfordshire Record Society. Clarendon Press. Oxford. 1914.