Notum sit omnibus fidelibus tam presentibus quam futuris super lite que inter abbatem et monachos Beccenses et Robertum priorem et canonicos Sancte Frideswide de Oxen[] de ecclesia de Bello Monte et de omnibus eius pertinenciis diu agitata est hoc modo est transactum et hac transactione litem penitus decisam Predictus siquidem Robertus et canonici toti prorsus querele et iuri quod se in ecclesia de Bellomonte et pertinenciis suis habere contendebant prefatis monachis Beccensibus imperpetuum renunciaverunt et ea in manum domini pape Eugenii refutaverunt unde ab eisdem monachis per manum eiusdem pape willam que dicitur Edruetuna cum omni decima dominii eiusdem wille et duabus garbis rusticorum de ipso tantum fundo percipiendis in suum perpetuum dominium receperunt cum omnibus pertinenciis suis in pascuis et pratis in bosco et plano et molendinis salvo universo iure reliquo parrochiali monachorum Beccensium et terciam garbam rusticorum decime eiusdem wille que ad ecclesiam de Hungerford in cuius parrochia ipsa willa sita est proprie spectat ita scilicet ut in ipsa willa ecclesiam vel capellam nunquam imposterum constituere valeant Hec inter eos transactio Parysius acta est in presencia sicut diximus domini pape Eugenii tercii ipso mediante et percipiente asistentibus sancte Romane curie episcopis et cardinalibus anno ab incarnacione domini mcxlvii mense maio viii Kal[] Iunii indictione decimo Huic quoque transactioni cum multis aliis et nominatissimis viris interfuerunt dominus Theobaldus Cantuar[iensis] archiepiscopus dominus Hugo Rotomag[ensis] archiepiscopus dominus Algarus Coustanciensis dominus Rotrocus Ebroicensis dominus Arnulfus Luxovien[sis] et dominus Willelmus Norwicensis

Source Fulltext: Select Documents of the English Lands of the Abbey of Bec. M. Chibnall. Camden Third Series, V.73. Offices of the Royal Historical Society. London. 1951.