Omnibus Christi fidelibus ad quos presens scriptum peruenerit Willelmus filius Luce de Netherhardr eternam in domino salutem Nouerit uniuersitas uestra me pro salute anime mee et omnium predecessorum et successorum meorum dedisse et hac presenti carta mea confirmasse in liberam et puram et perpetuam elemosinam deo et ecclesie sancti Gregorii extra ciuitatem Cant et canonicis regularibus ibidem deo seruientibus sexdecim solidos et viij denarios liberis redditibus in tenemento meo de Netherhardr cum omnibus pertinentiis suis uidelicet totam terram illam que quondam fuit Wlmeri rufi quam modo tenet hereditarie Radulfus de Boywik pro decem solidis de redditu assiso et xxv denariis et obolo pro consuetudinibus ad iiij terminos reddendos scilicet ad festum sancti Michelis iij solidos et ad festum sancti Andree iij solidos et iij obolos et ad mediam Quadragesimam iij solidos et ad festum sancti Iohannis Baptiste iij solidos defendendo eam in seruitiis et scutagiis domini regis pro xx acris de warlande que seruitia et scutagium debentur predictis canonicis Et de iij acris quas Einulfus Burri tenet pro iij solidis de redditu assiso et iiij denariis pro consuetudinibus ad eosdem terminos Et de una acra quam Godeleua filia Northmanni de Hermodesole tenet pro xij denariis de redditu assiso et ij denariis et obolo pro consuetudinibus ad eosdem terminos percepiendos Uolo igitur quod predicti canonici predictas terras et predictos tenentes cum eorum homagiis et seruitiis et consuetudinibus in omnibus rebus et casibus ad me undecumque prouenientibus uel ad heredes meos pertinentibus habeant et possideant libere et quiete pacifice et honorifice sine aliquo retenemento mei uel heredum meorum Et ego Willelmus et heredes mei defendemus et warantizabimus hanc elemosinam nostram ex scutagio domini regis et ex omnibus aliis seruitiis et consuetudinibus inde debitis uersus omnes gentes inperpetuum Et sciendum est quod predicti tenentes non amplius dabunt de releuio quam de redditu assiso dare consueuerunt Facta autem fuit hec mea donatio anno secundo domini Henrici regis Anglie filii domini regis Iohannis et recordata in curia mea de Netherhardr et presenti scripto sigilli mei testimonio roborata Hiis testibus Thoma de Dene Iohanne filio eius Roberto de Tremfeld Giliberto filio Ricardi Caluel Willelmo de Delce Thoma de Hermodesole Ricardo de forstallo Warino de Hermodesole Iordano fratre suo Adam le Breth Waltero pistore Euerardo ianitore Iohanne coco Et multis aliis

Source Fulltext: Cartulary of the Priory of St. Gregory, Canterbury. A. M. Woodcock. Camden Third Series, V.88. Offices of the Royal Historical Society. London. 1956.