Uniuersis sancte matris ecclesie filiis Ricardus filius Symonis de Foxton salutem sciatis me pro salute anime mee et omnium meorum tam uiuorum quam mortuorum concessisse et hac mea carta confirmasse deo et sancte Marie de Caritate et ecclesie sancti Augustini de Dauentre et monachis ibidem deo seruientibus donacionem ecclesiarum quam fecit eidem ecclesie Robertus filius Uitalis auus meus et pater meus post eum concessit et confirmauit Dedit enim Robertus prefate ecclesie eo anno quo mortuuus fuit Anselmus Cantuariensis archiepiscopus in perpetuam et liberam elemosinam quantum ad se et heredes suos [pertinet] ecclesias maneriorum suorum Foxtone uidelicet Guthmundelay Bitlesbroc Scaldeford Braibroc Lubenho cum omnibus appendiciis et pertinenciis earum in terris et hominibus in decimis et oblationibus et ceteris quibuscunque beneficiis Uolo igitur et firmiter precipio quod predicta ecclesia sancti Augustini de Dauentre et monachi beneficia memorata quiete et honorifice teneant et sicut eis data fuerunt in perpetuam et liberam elemosinam iure perpetuo pacifice per omnia possideant saluo iure forinseco quod euidenter designatur in carta patris mei Ut ergo rata et stabilis sit mea concessio et mea confirmatio sigilli mei testimonio utramque corroboro Ibidem eciam ego et uxor mea et liberi sepeliemur Huius rei testes sunt Thomas capellanus Adam filius Henrici de Bugeden Simon Uictor Radulphus Cocus et plures alii Hec carta facta fuit apud Dauentre primo anno regis Ricardi

Source Fulltext: Cartulary of Daventry Priory. M. J. Franklin. Northamptonshire Record Society, V.35. Northamptonshire Record Society. Northampton. 1988.