Wy de raid to Northeym bekennen unde betugen obinbar in dussen breve under unser stadt groten inges(egel), dat Tile Impteshußen, unße borger, mit willen unde fulborde Henricus synes sohnes unde Eller Anshelm(e), synes swagers, unde al syner erven, den des von rechte to dhonde was an synem huße, hove unde stede, gelegen in unser stadt up der Molenstraten am Orde unde an Tilen Tymmermans huß, vor twelff marck unser stad weringe ome al unde wol to dancke betalt rechts unde redelikes kopes verkofft hefft twe unddrittich schillinge jerlikes tynses der vorgeschreven weringe, de de vorbenante Tile Imptesußen, syne erben unde de besitter synes vorgeschreven hußes, hoves unde stede alle jar up Passchen gudliken unde wol to dankcke geven unde betalen willen dem erbarn hern Johanni Nydda presbyter, synen erven, testamentarium unde helderer dusses breves mit oreme guden willen. doch hefft de borbenante Tile Impteshuß sick unde synen medebenanten macht beholden, den vorgeschreven jarliken tynß alle jar up Passchen wedder afftokopende mit twelff marcken der vorgeschreven weringe, dest se dat dem vorbenanten erven Johanni Nydda prestere unde synen medebenanten eyn ferndel jars edder eher to vorn verkundigen unde den up den neistfolgenden Passchen medebetalen alle umetalde unde bedageden gulde na verlopener tyd doch unvertegen des rades rechticheit. gegeven unnde gescheyn na Christi unnses leven hernn gebordt vehrteynhundert im vehrundnegentigesten jare am mandage na dem sondaghe Quasimodogeniti.

Source Fulltext: möglicherweise von Alfred Bruns