Ich Hainreich, Meinoltz svn, purger in dem Hellein^a, vergich vnd tv^en chunt offenbar an disem | prief allen den, die in ansehent oder ho^erent lesen, daz ich mit wol bedahtem willen vnd mv^et vnd nach meiner frevnt rat mich verzigen han vnd verzeich aller der ansprach, die ich han gehabt gein dem ersamen abbt vnd der sammvnge ze Raittenhaslach vmb zwo werichstet in dem wald, der genant ist der Vevhtenpach^b, vnd haizzent die werichstet der Tieffenbach vnd der Durrenberch^c, da von pin ich gestanden gar vnd gentzleichen, wan ich dehain reht da niht het, als mich mein friunt beweiset habent, weder svnnenthalb noch schatenhalb ze paiden seitten. Vnd daz div verzeichennvzze furbaz von mi^er vnd von meinen erben vnd von meinen frevnten allen dem vorgenannten abbt vnd der sammvng ze Raittenhaslach stet vnd vnuerchert beleib, gib ich in disen offen prief ze æinem waren vrchunde mit der erweren zwaier manne ynsigel versigelt Seibot dez Paizzen^d vnd Chu^enratz seins bru^eder in paiden an allen schaden. Vnder der zwaier ynsigel, di si durch meiner pet willen an den prief gelæit habent, verpint ich mich mit meinen triuwen alles daz stet vnd gantz ze pehalten, daz vor an dem prief geschriben ist, wan ich niht aigens ynsigels het. Is sint auch pei der vorgenanten verzeichnvzze gebesen vnd sint sein zivge her V^elreich der Paizze^e rihter in dem Hellein^a vnd sein bru^eder Seibot vnd Chu^enrat vnd Fridreich der Pv^eb^f, Fridreich der Schreiber, Chu^enrat der Pierler vnd ander erber levtte. Der prief ist geben nach Christes geburt vber driuzehen hundert jar dar nach in dem sechs vnd dreissigistem jare, an sant Mærteins tage.

Source Fulltext: Krausen, Edgar, Die Urkunden des Klosters Raitenhaslach, 1034-1350, München, 1959, Nr. 699, S. 597-598