Wy Harman abbet des stiffts tho sunte Michaele bynnen Hildensem sunte Benedicti ordens bekennen openbar in dussem breve vor alsweme, dat wi hebben belenet unde belenen iegenwordigen in unde mit crafft dusses breves tho eynem rechten manstadigen erfflene Hans Brandes den doctoren, Hans Brandes zeliger sone, borger tho Hildensem, mit veer nygen Hildensenschen schilligen uthem fronentinse bynnen Hildensem, unde he schal unsem stiffte, gudere unde personen, truwe unde hold sin alse he van sodaner leenwaringe plichtich is, unde wi willen des sin bekennige here unde were wesen vor aller rechten ansprake, so vaken ome des noet unde behoff is unde gheborlikerwys van uns gheesschet wert. Dusses tho merer orkunde unde tuchnisse hebbe wi unse secret witliken an dussen breff gehenget, unde is gescheen in dem jare na Christi gebort Veffteinhundert in dem drittigesten jare, des dinxschedages nach Mathie apostoli in der hilgen Vasten.||