Bonifatius episcopus servus servorum dei. Venerabili fratri Archiepiscopo Pragensi Salutem et apostolicam benedictionem. Oblate nobis pro parte dilecti filii Nobilis Viri Henrici Ulrici Baronis Baronie de Rosenberg, domicelli et dilecte in christo filie Nobilis mulieris Elizabeth dilecti filii Nobilis Viri Petri Baronis Baronie de Crawar alias de Plumnaw domicelli nate domicelle Pragensis et Olomucensis diocesis petitionis series continebat quod ipse ad conservandum amicitiam et amorem eorum consanguineos et amicos desiderant invicem matrimonialiter copulari sed quia Tertio et Quarto consanguinitatis gradibus invicem sunt coniuncti huiusmodi eorum desiderium adimplere nequeunt dispensatione super hoc apos-tolica non obtenta. Quare pro parte dictorum Henrici et Elizabeth nobis fuit humiliter supplicatum ut super hoc eis de oportune dispensationis gratia providere de benignitate apostolica dignaremur. Nos igitur ex premissis et certis aliis causis nobis expositis huiusmodi supplicationibus inclinati, fraternitati tue de qua in hiis et aliis specialem in domino fiduciam obtinemus per apostolica scripta committimus et mandamus quatinus si est ita dictaque Elizabeth propter hoc rapta non fuerit cum eisdem Henrico et Elizabeth ut impedimento quod ex premissis provenit non obstante matrimonium inter se contrahere et in eo postquam contractum fuerit remanere libere et licite valeant apostolica auctoritate dispenses prolem ex huiusmodi matrimonio suscipiendam legitimam nuntiando. Datum Rome apud Sanctum Petrum II Nonas Decembris Pontificatus nostri Anno Decimo. Pro N. de Bento. (Scriptor:) Je. de Ferentino

Source Fulltext: Peter Peusquens, Karlsruhe