|N001|Wir Johans, Jurge und Thomas, bruder genant Freuntzberger, bekennen und tun kunt offinlich mit diesem brieve allen den, die yn |N002|sehen odir lesen, wann der allirdurchluchtigiste furste und herre her Karl von Gots gnaden romischer keiser, zu allen zeiten merer des|N003|richs und kunig zu Beheim , unsir lieber gnediger herre, vor alle schult, die er und seliger gedechtnuzze der hochgeborn furste und herre |N004|her Johans, etwenn kunig zu Beheim, sein vatter, unsir lieber herre, uns und unsirn erben und nachkomen schuldig gewesen seint und |N005|doruber wir yre brieve gehabt haben, uns von unsir und unsir erben und nachkomen wegen syben hundert guter guldin geben und ver¬ |N006|richtet hat gnedeclich, domit uns wol benuget und danken seinen gnaden und dorumb sagen wir den egenanten unsirn gnedigen herren den keiser, |N007|seinen vatter seligen und ir erben und nachkomen aller schult, die sie uns und unsirn erben schuldig gewesen seint, doruber wir brieve ge¬ |N008|habet han odir nicht, in welcher weis die schult ist gewesen, los und ledig, und wollen der nymermer gefordern, und ob dheine brieve umb |N009|soliche schult in dheinen zukunftigen zeiten zu lichte quemen und vorbracht wurden, die sullen keine craft noch macht haben in dheine |N010|weis und sullen uns, unsirn erben und nachkomen keine hulfe bringen. Mit urtkund ditz brieves, versiegelt mit myn Johansen insigel |N011|vorgenanten, und wir Jurge und Thomas, bruder des obgenanten Johans, bekennen uns aller dieser vorgeschriben dinge under desselben unsirs bruders |N012|insiegel, wann wir unsirs eygen insiegel nicht enhaben zu diesem male. Geben zu Nuremberg nach Cristus geburt drutzenhundert jar, dornach |N013|in den sechtzigstem jare an sant Jacobes tag, des heiligen aposteln .