|N001|Ich Hainrich Grozz, schultheizz, und wir die scheppfen der stat zu Nurnberg veriehen offenlichen mit disem brif, |N002|daz fur uns kom in geriht Ulrich Stromair von wegen dez allerdurchleuchtigsten fursten, unsers genedigen herren |N003|hern Karls, dez romischen kaisers und kunges zu Behaim, und erzeugt als reht, waz mit den ersamen mannen |N004|Berhtolt, dem tucher, mit Peter Stromair und mit Hainrich, dem gewder, die sagten auf ir ayde, dez sie des |N005|geladen zewge, wem umb die zwen hof zu Heuchlingen gelegen, und umb die zwen hof zu Weizzenbach gelegen |N006|die Ulreich Winterstain, burger ze Nurnberg, gekauft het auf einen widerkauff von dem vesten ritter hern Hainrich |N007|vom Wildenstain umb funfhundert pfunt haller, ains und ahczig pfunt und vir und ahczig haller, als der |N008|brif sagt, den er daruber het den die obgenanten zeugen gesehen heten, dez het der vorgenant Ulrich Winterstain |N009|mit gesampter hant frawn Agnesen, seiner elichen wirtinn, veriehen und bechant, daz sie dieselben vir hof, als |N010|sie hie vor geschriben sten unserm genedigen herren dem Romischen kaiser wider ze losen solten geben zu der |N011|vesten ze dem Rotenberg, alz ainem kunge ze Behaim oder seinen erben und nachkumen, welches iares sie die |N012|wider losen wollen, umb so vil gelcz, als hie vor benant ist, doch also daz die losung ie geschehen, sollt virzehen |N013|tage vor lihtmesse oder virzehen tage darnach, als losung reht ist on gewerde, und dez zu urkund ist im dirr |N014|brif mit urteil von geriht geben, versigelt mit dez gerihcz ze Nurnberg anhangendem insigel. Geben an |N015|sant Ulrichs tage, nach Gotes gepurt drewzehenhundert jar und in dem sechczigistem jar .