|N001|Wir Rudolf von Gots gnaden hirtzoge in Sachsen, dez heiligen reichs oberster marschalk, bekennen und tun kunt offenliche mit disem brive allen den, die yn sehen |N002|oder horent lesen, alleine di brieve dez allirdurchluchtigsten fursten herren, hern Karls romischen kuniges zu allen zeiten merers dez reichs und kuniges zu Behem, unsers |N003|lieben gnedigen herren, di er uber sine pfantschefte der stat und dez landes zu Eger und der vesten Flozz und Barchstein und waz darczu gehoret, gehabet hait und di |N004|ouch seliger gedechtnusze di hochgeborn fursten, ettwanne kunge zu Beheim, seiner eltern durch mirglicher sachen und dem heiligen reiche behalden und erworben |N005|haben, von wiedertzemer ungeschiecht beide verburnet und verlorn sien, daz er da mide sein recht nicht bewysen mag, als billiche were, doch, sint dem male, daz uns di |N006|selben pfantschaft wol kundig ist und wir solicher gelegenheit wol und gentzliche underwiset sin, daz di obgenante stat zu Eger mit dem lande und di vesten Flozz und |N007|Barchstein mit aller zugehorunge dem kunigriche und der cronen zu Beheim umb vierczig tusent marg lotiges silbers, sechstehalben gulden florenczir gewichte |N008|fur iecliche mark zu rechen, zu rechtem pfande, rechte und redliche von wegen dez heiligen reichs versetzet sint, und sein eldern und vorfarn, kunige zu Beheim, in |N009|gewer und rechter besitzunge der selben pfantschefte gewesen sin und noch ist uff dysen hutigen tag, dez haben wir angesehen di besundern gnade und den nutczen, |N010|fleiz und ouch di steticliche arbeit, do mit der obgenante, unser herre, dez heiligen reichs nutcz und ere getrewliche understanden hait, und haben ouch gepruvet die mirg¬ |N011|olichen getrewen dienste, di sein eldern, etwenn hochgeborn kunige zu Behem, dem obgenanten reich erliche und nutczliche offt getan haben, wan auch daz kunigrich zu Be¬ |N012|heim eyn edles wirdiges gelid ist der, romischen cronen, so meynen und wullen wir solichen schaden dez obgenanten kunigrichs zu Beheim vernunfticlichen un¬ |N013|dersten durch di besundere truwe, domit wir, als eyn kurfurste dez heiligen reichs verbunden sein, uff di rede daz der obgenante unser herre daz selbe sein kunigreich |N014|zu Beheim durch sulchen zwivel icht beschediget oder gehindert werde, so bekennen wir mit wolbedochtem mute und mit rechter wisze, daz die obgenante stat |N015|zu Eger mit dem lande und di vesten Flozz und Barchstein mit merchten, dorfern, mit edlen und unedlen, armen und reichen, kreizen und zu gehorungen, di |N016|in den gemerken der selben lande und vesten gelegen und geseszen sein, dez obgenanten unsers herren, als eynes kuniges zu Beheim, seiner erben und nachkomen, ku¬ |N017|nige zu Beheim, und der cronen dez selbin kunigriches rechte pfantschafte lange gewesen sein und noch sein vor viertzigtusent mark lotiges silbers soliches |N018|gewichtes, als da vor begriffen ist. Und di selben pfantschaft bestetigen wir mit rechter wiszen in aller masze, als davor begriffen ist, und geben darzu unser |N019|gunst, willen und wort, als eyn herczog von Sachsen, oberster marschalk und eyn kurfurste dez heiligen reichs. Mit urkunde dicz brives, versiegelt mit |N020|unserm groszer ingesigel, der geben ist nach Cristus geburte druczehen hundirt jar und und dar nach in dem vier und funfftzigestem jar, uff|N021|sente Michahelis tag .