|N001|Wir Baldwin von Gots gnaden erczebischove zu Tryere, des heiligin reichs erczcanczler durch Welische lant und daz kungrich zu Arle, bekennen und tun kunt offenlich |N002|mit disem brive allen den, die in sehent odir horent lesen, alleine die brive dez allirdurchluchtigsten fursten und herren, hern Karls romischem kungs zu allen tzeiten merer|N003|des reichs und kungs zu Beheim , unsirs lieben gnedigen herren, die er ubir seine pfantscheft der stat und des landes zu Eger und der vesten Flozz und Parkstein und waz |N004|dorczu gehoret, gehabt hat und die auch seliger gedechtnuzze die hochgebornen fursten, ettwenne kunge zu Beheim, seine eltern durch merklichin sachin willen von dem heiligen |N005|reiche behaldin und derworben haben, von widirczemer ungeschicht beyde verbrennet und verlorn sint, daz er domite sein recht nicht beweisen mag, als billich were, |N006|doch, sintdemmal, daz uns dieselbe pfantschaft wol kundig ist und wir sulchir geleginheit wol und genczlich undirweisit sein, daz die obgenante stat zu Eger mit dem lande |N007|und die vesten Flozz und Parkstein mit allen czugehorungen dem kungriche und der cronen zu Beheim umb viertzig tusent mark lotiges silbers, sechst halben guldin floren¬ |N008|tzer gewicht fur ye die mark czu reyten, zu rechtem pfande, recht und redlichen, von wegen des heiligin reichs versetzit sind, und sein eldirn und vorvarn, kunge zu Be¬ |N009|hem, in gewere und rechtir besitzunge derselbin pfantschefte gewesen sint und er noch ist uf disen hutigen tag, des habin wir angesehin die besunder gnade und |N010|den nutczen, fleizz und auch die steticliche arbeyt, domit der obgenante unsir herre, dez heiligin reiches nutz und ere getrewlich undirstandin hat, und habin auch ge¬ |N011|bruvet die merklichin getrewin dienst, die seine eldern, ettwenne hochgeborne kunge zu Behem, dem obgenanten reich erlichin und nuczlichin offte getan haben, wanne |N012|auch das kungriche zu Behem ein edlez und wirdigez gelyet ist der, romischen cronen, so meinen und wollen wir sulchin schaden dez obgenanten kungrichs zu Behem vernuf¬ |N013|ticlich undirsteen durch die besundire trewe, domit wir, als ein kurfürste dem heiligin reich verbunden sein, uf die rede, daz der obgenante unsir herre daz selbe sein kung¬ |N014|rich zu Behem, durch sulchin tzweyvel icht beschedigit oder gehindirt werde. So bekennen wir mit wolbedachtem mute und mit rechter wizzen, daz die obgenante stat zu |N015|Eger mit dem lande und die vesten Flozz und Parkstein mit merkten, dorfen, mit edlen und unedlen, armen und reichen, kreizzen und allen zugehorungin, die in den ge¬ |N016|merken derselbin lande und vesten gelegen und gesezzen sint, dez obgenanten unsirs, herren als eines kungs zu Beheim, seiner erbin und nachkumen, kunge zu Beheim, und der cronen |N017|dezselbin kungrichs rechte pfantschaft lange gewesen sein und noch sein fur fyertzig tusent mark lotiges silbers sulchis gewichtez, als dovor begriffen ist. Und diesel¬ |N018|bin pfantschaft bestetigen wir mit rechter wizzen in allir der mazze, als dovor begriffen ist, und gebin dortzu unsire gunst, willen und wort, als ein ertzbischove zu |N019|Tryere, der heiligin reichs ertzcanczler durch Welische lant und daz kungrich zu Arle un kurfurste dez heiligen reichs. Mit urkund dicz brives, versigilt mit |N020|unserm insigel, der gebin ist czu Meincz nach Cristus geburtte dreyczen hundirt jare, dornoch in dem drey und fumfczigsten jare dez nechstin suntags nach dez heiligen|N021|czwelfboten santh Thomas tag .