|N001|Wir Rudolf von Gocz gnaden pfallenczgraf bi Rine, herczoge in Beygern, dez heiligen romischen richs obrister trugsecze und |N002|vicarii in tuschen landen, bekennen uns offenlichen mit disem briefe, alz wir den edeln herren Ulrichen und Johansen, gebrüdern|N003|lantgrafen von Leutenberig , unsern lieben oheim, schuldig sin und gelten sullen zwei tusent guldin florin guter und geber, |N004|umb ir dancknemen dienst die sie uns biz her getan habent, und noch furbaz tun sollent und mögent, und och umb daz, daz |N005|si unsern rat gesworn habent. Und wir si der selben zweier tusent guldin solten bewiset han nach dez edeln herren, |N006|unsers lieben öheims, Johansen burgrafen von Nurenberg, rat, alz sie dez briefe von uns dar umb habent, dez bewisen, |N007|wir sie und ir erben der selben zweier tusent guldin uff aller pfantschaft die sie von uns inne habent, es si von unsers |N008|vettern, keyser Ludwigs seligen, wegen daz uns zu teil ist an gevallen oder die sie von uns inne hant nach irre |N009|briefe sage, die si dar über hant und sollent, die selben pfantschaft inne haben nuczen und niezzen nach allen rechten, |N010|alz ir briefe sagent, die si vor dar über hant alz lange, biz daz wir sie oder unsere erben von in oder iren erben umb die |N011|vorgenanten zwei tusent guldin zu der summe gelcz, die in vor dar uf verschriben ist nach irr briefe sage erledigen und erlösen |N012|gar und genczlichen ane geverde. Were och, daz wir oder unser erben, si oder ir erben die vorgenanten zwei tusent guldin |N013|bewisten uff unsern zellen oder sust anderswo, da si irs gelcz sicher sin, so sol die vorgenant unser pfantschaft umb die |N014|vorgenanten zwei tusent guldin uns und unsern erben von in und iren erben ledig und loz sin ane widerrede und ane |N015|allez geverde. Und dez zu urkunde geben wir in disen briefe, besigelt mit unserm insigel, der geben ist zu der |N016|Nuwenstat an sampcztag nach sant Martins tag nach Cristus geburt druzehenhundert jar und dar nach|N017|in dem zwei und fumfzigisten jare .