In dei nomine amen. Quia scriptum est, dum tempus habemus operemur bonum, vt veniente tempore messis ex terreno semine fructus in celestibus colligere valeamus perpetuos. Quod nos Johannes plebanus et magister ciuium consules jurati ac tota communitas ciuitatis Rosmberk aure cordis attendentes, cupientes ob augmentum cultus diuine ac ministrorum ecelesie in Rosnberk bonorum operum participes fieri, et nobis et aliis Christi fidelibus, qui ad infrascripta sua nobis sunt largiti, subsidia pro temporalibus celestia cumulare, ad honorem et laudem dei omnipotentis et sue matris beatissime virginis Marie ac omnium sanctorum et precipue ad beati Nicolai confessoris ecclesie nostre patroni gloriosi gloriam sempiternam nec non ob remedium animarum nostrarum ac omnium predecessorum nostrorum et ad redimenda peccata omnium viuorum et mortuorum nobis ad hoc suffragantium matura et preuia deliberatione et de voluntate ac consensu reuerendi patris domini Johannis de Crumlow decani ecclesie et administratoris archiepiscopatus Pragensis commissarii fidei ac decretorum doctoris et venerabilis patris domini Thome abbatis Altiuadensis collatoris et patroni dicte ecelesie talem insimul fecimus concordiam: In primis quod quolibet die dominico aut alio quocumque die festiuo celebri missa cantata maturo tempore, que alias matura apellatur, de beata virgine Maria secundum temporis qualitatem cantetur, et quod qualibet feria secunda similiter cantata pro animabus benefactorum defunctis teneatur, nisi esset dies celebris impedimento, et tunc alio die feriali competenti predicta missa defunctorum cantando suppleatur; quam missam presbyter cantans petitionem faciet pro animabus illis, que huic pio operi manus adiutrices porrexerunt, generalem. Item quod quolibet alio die feriato in septimana missa maturo tempore lecta habeatur, his diebus infrascriptis dumtaxat exceptis videlicet in natiuitate domini epiphanie resurrectionis dominice ascensionis Christi penthecostes corporis Christi anunciationis purificationis visitationis assumptionis sancte Marie virginis omnium sanctorum et die animarum omnium. Sed considerans ego Johannes plebanus predictus, quod vnus presbyter aut capellanus de nouo fundandus non possit omni die predictas missas pro voto communitatis explere ac quotidianus in diuino obsequio misse mature propter impedimenta canonica esse honus pretactum, super me et omnes successores meos ex voluntate et assensu superiorum meorum modo infrascripto assumpsi et diuisi ad preces ciuium et comunitatis predicte: quod ego et omnes successores mei capellanum specialem debeo et debent deputare et disponere eique in dote cameram assignare, expensas ministrare et pro labore suo satisfacere et cum eodem componore. Qui capellanus ad tres missas in septimana erit obligatus, hoc est, die dominica ad vnam cantatam eria quarta ad secundam et feria sexta ad terciam lectas, et hoc si his duobus diebus ultimis erit feria, sed si his diebus duobus erit festum celebre, tunc iidem (sic) capellanus tenebitur ad cantatas. Etiam iidem capellanus ad prefatas tres missas ordinatus vesperis matutinis processioni misse quolibet die dominico aut alio festiuo similiter et in diebus rogationum processioni et in vesperis defunctorum, vbi agitur communis memoria omnium animarum, debet et ftenetur presens interesse, et jura mea et successorum meorum plebanorum vt offertoria testamenta quecunque non debet pro se vsurpare, sed cum illis omnibus ad me et successores meos respectum habere et mihi dare, nisi ex gratia velim ex predictis juribus aliquid eidem erogare. Residuis autem quatuor diebus in septimana mei et successorum meorum vicarii duo, quos ex antiqua consuetudine seruare debeo, in curia mea missas quatuor, siue lecte siue cantate, ut predicitur, euenerint, implere debent, cum quibus vicariis et cum rectore schole concordare debeo pro eorum laboribus satisfaciendo, modo quocumque meliori sciuero et potero. Item domini ciues predicti e conuerso mihi meisque successoribus capellano et vicariis prefatis debent lumen, quod hucusque dederunt tempore hyemali et estuali, ad prefatas missas cantatas et lectas dare et tribuere. Etiam dicti domini ciues sine omni dilatione et quacunque recusatione mihi plebano et meis successoribus debent et tenentur quindecim sexagenas grossorum bone monete in terra currentis et recipientis eandem quolibet anno dare diuisim, in festo sancti Georgii martyris medietatem vnam et in festo sancti Galli medietatem alteram, et decem tinas siliginis etiam quolibet anno, siue siligo tunc in bono siue in caro foro fuerit. Item domini ciues illos centum grossos minus sex grossis, quos mihi prius soluebant hucvsque pro secundo vicario seruando deputatos, hos adhuc mihi et meis successoribus soluere et dare debent ultra illas quindecim sexagenas grossorum. Et pro petitionibus generalibus fidelium defunctorum predictis etiam dicti domini ciues vltra predicta omnia etiam dare debent im grossos annuatim. Hec etiam pena adiecta est, quod si missa cantata aliquo die predicto tenta non fuerit, tunc duo grossi mihi et successoribus meis deperire debent, si autem lecta, tunc vnus grossus tantum. Et hec littere concordie inter nos plebanum et ciues predictos tam diu debent suum firmamentum et robur obtinere, quam diu census liber per prefatos dominos ciues non erit dispositus pro capellania predicta. In quorum omnium fidem et robur firmius predictorum nos Johannes plebanus et totum commune ciuitatis predicte sigilla nostra his litteris beniuole et de certa nostra sciencia appendimus. Et ut maior fides adhiberetur, etiam predictis prefatos reuerendos patres dominum Johannem decanum et administratorem etc. et dominum Thomam abbatem etc. necnon et famosum clientem dominum Johannem dictum Sudek de Dluha petiuimus, vt sigilla eorum etiam his litteris appenderent et hanc concordiam munirent. Datum et actum Crumlow anno domini millesimo quadringentesimo septuagesimo primo die S. Thome de Aquino, que fuit septima Marcii.

Source Fulltext: PANGERL, Stift Hohenfurth (=FRA II/23, Wien 1865) S. 323-325