Ich Mertl von Leubesdorf vergich offenbar an dem prief für mich vnd für all mein erben vmb meinen ganczen weingarten ze Pulka gelegen in der obern holczpewnt ze nächst der Heglwerder weingarten mit ainem rain vnd zenachst Christans des Weidner weingarten mit dem andern rain, den ich auch ze purchreeht han gehabt von dem edlen vnd meinem gnedigen herren graf Burchharten von Maidwürg, do von ich im hab gedint all jar jerleich an sand Michels tag dreizzk Wienner phening ze purehrecht vnd nicht mer. Den selben vorgenanten weingarten mit allen den rechten, vnd ich in in purchrechts weis vnd gewer herpracht vnd gehabt han, hab ich recht vnd redleich verchaufft und hin gegeben di zeit, do ich ez wol getuen macht, dem erwirdigen vnd geistleichen herren hern Otten di zeit abt des erwirdigen gotshaws ze Hochenfurt vnd auch dem ganczen conuent desselben gotshaws vmb sechczehen phunt Wyenner phenning, der ich vnd mein erben gancz vnd gar von in gericht vnd weczalt pin an allez vercziehen. Ez schullen auch di vorgenanten all der abt vnd daz conuent des obgenanten gotshaws in den vorgenanten weingarten ledichleich vnd vnuerchumert von vns haben vnd zu irm frum wenden, wie in daz aller pest fuegt, mit verseczen verchauffen geben, wem sew wellen, an allen irrsal vnd an allen chrieg. Ich pin auch des mit sampt meinen erben ir rechter scherm vnd gewer für ansprach vnd invell oder chrieg, oder waz in mit recht daran abget, daz schol ich in allez auzrichten vnd abtragen an all ir scheden vnd an all ir mue, als purchrechts recht ist vnd des landes recht ze Osterreich. Daz versprich ich mit sampt meinen erben dem egenanten erbern herren hern Otten dem abt vnd dem ganczen conuent des obgenanten gotshaus ze Hochenfurt stet ze haben mit meinen trewn an allez geuer mit vrchund des prief. Vnd seid ich selb di zeit nicht aegen insigel het, do hab ich vleizzig gepeten di erbern ped Jansen den Frenchlein ze Pulka vnd ||
Stephlein den Fewchter, daz sew des chauffs vnd der sach geczeug sind mit irn anhangunden insigeln in peden an schaden. Vnder derselben peder anhangunden insigl an dem prief verpint ich mich vorgenanter Mertl von Leubesdorf mit sampt meinen erben alles des vollaest sein vnd auch stet haben, daz vor an dem prief geschriben ist. Der brief ist gegeben nach Christes gepurd drewczehen hundert jar darnach in dem siben vnd achczkisten jar an sand Thamans tag des heiligen zwelifpoten.

Source Fulltext: PANGERL, Stift Hohenfurth (=FRA II/23, Wien 1865) S. 204-205