Ego Benessius cum fratre meo germano Przibikone de Krzemze ac alio Przybikone fratre nostro de Chlvm omnes vnanimiter et vna voce constare desideramus vniuersis presencium noticiam habituris, quod bona deliberacione maturoque consilio prehabitis omnes concorditer de bonis nostris hereditariis in villa Kamenn habitis in hereditatibus, quas Peter Griss Hoffuel Jacob Czugwaich et Eblinus incole ville illius possidere dinoscuntur, vendidimus iusto titulo vendicionis nobili domino nostro domino Johanni de Rosennberk duas sexagenas reddituum cum quatuor grossis grossorum Pragensium annui et perpetui census cum omnibus juribus vtilitatibus obvencionibus bernis robotis exaccionibus honoranciis causis judicialibus emendis deuolucionibus et generaliter omnibus prouentibus, quibuscunque nominibus censeantur, ac omni pleno dominio, prout nos ipsi tenuimus nichil penitus nobis jurisdictionis aut proprietatis ibidem reseruantes, sed omne jus, quod ibidem habuimus, in ipsum dominum Johannem et eum, qui presentem litteram de sua voluntate habuerit, omnimode transfundentes, pro triginta vna sexagenis grossorum Pragensium, quas illico ab eo percepimus, cum paratis pecuniis integraliter persolutas. Promittimus igitur sincera fide nostra sine dolo omnes manu coniuncta et indiuisa eandem hereditatem cum suo censu preexpresso a quolibet impetente, cuiuscunque status fuerit aut condicionis, jure terre nostre Bohemie funditus et plenarie libertare et disbrigare et siagulariter a dotaliciis mulierum, si qua in illa hereditate emergerent impedimenta. Et quia nos prefati Benessius et Przibiko de Kremz hereditatem pretactam ad manus nostras tenemus tabulis regni nobis roboratam, ideo ne per heredes aut successores nostros aliqualis in posterum questio suboriatur, promittimus specialiter pro nobis heredibus et successoribus nostris vniuersis, eandem vendicionem firmam et inconwlsam perpetuis temporibus obseruare. Si vero qualiscunque in eo instancia oriretur et eandem hereditatem nos omnes prenominati Benesius et Przibiko de Kremz et Przibiko de Chlum secundum jura terre non exbrigaremus, tunc in aliis nostris propriis liberis et eque valentibus hereditatibus de totidem censibus et cum augmento tercie partis condescendere promittimus et debemus omnibus occasionibus penitus postergatis. Quod si non faceremus, tunc duo nostrum, qui primo moniti fuerimus, vnus alterius per absenciam aut incurabilitatem se penitus excusare non valentes ciuitatem Chrumpnaw intrare debemus, quilibet cum vno famulo et duobus equis ad obstagiandum in hospicio nobis per dominum Johannem aut presencium habitorem deputato, nec exire aliquo jure, quousque omnia prescripta ad effectum finaliter perducamus. Elapsis autem quatuordecim diebus continuis a monicione nobis de obstagio facta prestito per nos obstagio vel non prestito sepetactus dominus Johannes aut possessor presencium pecuniam prefatam triginta vnius sexagenarum cum augmento tercie partis recipiendi inter Judeos seu Christianos nostrum omnium super dampna plenam obtinent potestatem. Nos quoque continue obstagiare sumus astricti, donec de pecuniis preexpressis eciam cum augmento tercie partis ac vniuersis dampnis occasione non solucionis et uostre incurabilitatis quocunque modo contractis, per nos plene et omnimode fuerit satisfactum. Insuper quicunque hanc litteram de domini Johannis bona habuerit voluntate, eidem jus competit omnium premissorum. Inquorum omnium euidentiam et roboramentum sigilla nostra propria de certa nostra scientia presentibus sunt appensa. Sub anno domini millesimo trecentesimo octuagesimo quinto die sancti Benedicti confessoris gloriosi.

Source Fulltext: PANGERL, Stift Hohenfurth (=FRA II/23, Wien 1865) S. 192-193