Nos Petrus Judocus Vlricus et Johannes fratres de Rosenberch recognoscimus et ad vniuersorum noticiam cupimus peruenire, quod bona et libera voluntate ducti maturoque consilio desuper prehabito decimam plenam et integram de quadruplici grano, tantum scilicet siligneo triticeo ordeaceo et auenatico de omnibus, que in agris seu in ortis ad curiam nostram in Mutam pertinentibus proueniunt, ad ecclesiam in Rozenberch fundatam in honore saucti Nicolai confessoris, ad quam ipsa curia nostra predicta in iure spirituali et sacramentis pertinet ab antiquo, siue plebano eiusdem ecclesie disposuimus et statuimus dandam perpetue et soluendam per nos seu eciam alios nostros quoscumque successores, addicientes, quod si ipsa nostra sepedicta curia vna cum agris ad ipsam spectantibus per nos aut heredes nostros alio venderetur cuicumque, vel alio quocumque modo ipsam curiam locare contingat, semper plena decima de omnibus, ut supradictum est, ad sepedictam ecclesiam in Rozenberch siue plebano eiusdem ecclesie, quicumque fuerit, persolui debet atque dari integraliter et ex toto contradictione qualibet procul muta. Item eidem sepiusfate ecclesie in Rozenberch seu plebano eiusdem ecclesie, qui pro tempore fuerit, medium talentum denariorum Wiennensium damus et donamus expresse in judicialibus denariis de iudicio Rozenbergensi perpetuis temporibus percipiendum deputantes Ipse quoque plebanus, qui pro tunc extiterit, ibidem in capella castri nostri Rozenberch in honore sancti Johannis apostoli et ewangeliste fundata diuinum officium cum vna missa singulis feriis sextis consideratis premissis beneficiis debebit et tenebitur procurare. In casu tamen, vbi feria sexta comode missa non possit inibi celebrari, tunc alio quocunque vno die omni septimana in prefata capella ex prouisione prefati plebani officium diuinum vnius misse in perpetuum teneantur. Ne autem tempore succedente hec nostra bona et iusta donationis constitucio et salubris ordinatio per maliciam seu violenciam aliquorum valeat aliquatenus violari in dispendium animarum ipsorum et in dampnacionem sempiternam, presentes litteras scribi et sigillorum nostrorum munimine duximus roborari in testimonium et robur perpetue valiturum. Datum in Chrumpnaw anno domini millesimo trecensimo (sic) quinquagesimo sexto proxima feria secunda post dominicam, qua cantatur "Reminiscere“.

Source Fulltext: PANGERL, Stift Hohenfurth (=FRA II/23, Wien 1865) S. 114-115