In nomine sancte et indiuidue trinitatis amen. Quoniam humane condicio nature secundum status sui qualitatem mobiliter discurrens proniorque ad malum quam ad bonum, ad instabile quam ad stabile fore dinoscitur euidenter, necesse est, gesta hominum, ne in obluionis materiam decidant, apicibus scripturarum sagaciter perhennari. Eapropter nos Petrus de Rosenberch summus regni Boemie camerarius vniuersis tam presentibus quam futuris hanc litteram inspecturis in noticiam deducimus clariorem, quod ob remedium anime felicis recordacionis domine Wpole vxoris nostre dulcissime monasterio beate virginis Marie in Altovado ordinis Cysterciensis nostre fundacionis villas nostras Eybenstein, Styphtung, Swarczenpach, Freudental et curias, que wlgariter "dacz den hoefen" nuncupantur, cum omnibus pertinenciis earundem, agris cultis incultis pratis suluis pascuis aquis piscacionibus molendinis aquarumve decursibus et montibus, ea metarum, qua prefatas habuimus villas, certa et consveta distinccione pleno iure, quo nos antecessoresque nostri inconcusse ipsas possedimus, iusto donauimus proprietatis tytulo perpetuo possidendas, excepto dumtaxat iure nostro feodali, quo nobiles illius districti ab antiquo progenitoribus nostris et nobis sunt astricti, quod nobis et nostris successoribus perpetuo reseruamus. Ne igitur prenominate fundacioni nostre dilecte, cuius promocionis vtilitas singulariter nostro cordi insidet, de nostra sibi in pretaxatis villis facta donacione alicuius litis sev controuersie calumpnia possit in futurum suboriri, presentem sibi tradidimus litteram sigilli nostri maioris robore consignatam. Datum in Altovado anno domini millesimo trecentesimo decimo octauo in vigilia sanctorum martirum Cosme et Damyani.

Source Fulltext: PANGERL, Stift Hohenfurth (=FRA II/23, Wien 1865) S. 66-67