Ich^a) Amer von Luterberg¹ tun kunt vnd vergich offenlich mit disem brieff, dz ich von rechter ehafter nôt vegen^b) vnd vmb dz, L dz ich grossen schaden gewendet hab, verkôft vnd ze kôffen geben hab fur mich all min erben vnd nochkomen, die L ich vesteklich hier zu verbind, aines rechten redlichen vnd vnwiderrufflichen kôffs dem erwirdigen minem genadigen L herren Cun abt dez gotzhus ze sant Gallen² vnd sinen nochkomen vnd ôch dem yetzgenanten sinem gotzhus ze sant Gallen Hainrichen Groblin, Cunraten, Rudolfen, Johansen vnd Jacoben Groblin dez obgeschribnen Hainrich Groblis elich sun vnd ôch Margarethen wilunt Rudolf Groblis elichi tochter vnd Cunrat Groblis kinder, die er yetz hât, vnd all der obgeschribnen Groblin nochkome, die ôch min lehen gewesen sind von dem yetzgenanten gotzhus ze sant Gallen, vmb syben pfund pfenning guter vnd genamer Costentzer muntz, der ich ôch gar vnd gantzlich gewert vnd bezalt bin, vnd also verzich ich mich fur mich all min vorgenanten erben vnd nochkomen aller lehenschaft aller gewer aller kuntschaft aller zugnust lut vnd brieff aller rechtung vordrung vnd ansprâch, so ich oder min erben ald nochkomen oder yeman andro von minen wegen ye gehebt haind oder yemer gewunnen kondin oder mochtind ze den obgeschribnen Hainrichen, Cunraten, Rudolfen, Johansen, Jacoben vnd Margarethen vnd ôch dez obgeschribnen Cunrat Groblis kinder, vnd also lob ich mit disem brieff by miner truw an aines geschwornen aides statt fur mich all min erben vnd nochkomen, disen obgenanten kôff stat ze halten vnd niemer dar wider tun weder mit worten noch werken. Vnd des ze wârem offem vrkund so habl^b) ich obgeschribner Amer von Luterberg min aigen insigel offenlich gehenkt an disen brieff. By disem kôff sind gewesen Rudolf Mâgelsperg ze disen ziten vogt ze Yberg³, Dyetrich Horner, Hainrich Volger vnd Johans Horner alle dry burger der statt ze Lyechtenstaig⁴. Dis beschach vnd ward diser brieff geben ze Wil⁵ in der statt des jâres, do man zalt von Cristus geburt druzehenhundert jâr, nuntzig jâr vnd dâr nâch in dem sechsten jâre, an dem nachsten zistag noch sant Valentins tag.