Wir Rudolf von gottes ordnung abt vnd der conuent des gotzhus ze sant Johann¹ sant Benedicten ordens L in Costentzer bystun gelegen bekennen vnd tun kund offenlich mit disem brief, als die edeln wolerbornen herren L graf Rudolff vnd graf Hainrich von Werdenberg² gebruder vnser genadigen herren vnd vogt vnsers gotzhus ze L sant Johann obgenanten dieselben vogty vnsers gotzhus, die veste Starkenstain³ vnd darzu all ir lut guter vnd nutzz, so inen in dem sant Johanner tal vnd ouch in dem Turtal⁴ zugehorent, mit allen eren rechten gewonhaiten vnd zugehorden versetzt vnd yngesetzt hand den durluchtigen hochgebornen fursten hertzog Wilhelmen vnd hertzog Lupolten vnd irn gebrudern hertzogen zu Osterrich⁵ etc. vnsern gnadigen herren nach lut wysung vnd sag der phandbriefen, so besigelt darumb geben sint, sol manglichem ze wissent sin, das dasselb versetzen vnd ynsetzen mit vnserm gutem willen vnd gunst beschehen vnd vollfurt ist, vnd daz wir gemaynlich vnd gutwillklich vnser verhangnuzz darzu geben haben vnd geben ouch wissenlich mit dem brief. Vnd darumb loben wir mit kraft ditz briefs fur vns vnser gotzhus vnd vnser nachkomen, den obgenanten vnsern gnadigen herren von Osterrich vnd irn erben getruwlich gehorsam dyenstbar vnd gewartig ze synd mit allen sachen vnd vndertanikait, als wir den obgenanten vnsern herren von Werdenberg vnd irn vordern vntz her dyenstber gewesen syen vnd pflyhtig vnd gebunden waren ze tund, mit guten truwen ân all geuard, doch vns vnd vnserm gotzhus an allen vnsern rechten vnd guten gewonhaiten, als wir von alter her komen sint, vnschadlich. Mit vrkund dis briefs. Des ze ainer warhait vnd stater sicherhait haben wir obgenanter abt Rudolf vnser abtyg insigel vnd wir der conuent vnsers conuentz insigel fur vns vnser gotzhus vnd all vnser nachkomen offenlich gehenkt an disen brief. Der geben ist sant Anthonien abent nach Crists geburt druzehenhundert vnd nuntzig jar, dar nach in dem sechsten jar.