Officialis^a) curie Constantiensis omnibus presentium inspectoribus subscriptorum notitiam cum salute. L Noverint quod pridem ad invocationem discreti Johannis Hainiman de Lalwang¹ iudicis L provincialis in Schattpuch² et in sue iurisdictionis subsidium contra discretos Rudolfum de L Edegswile³ scultetum, Weltinum Yberger, Hainr. Borhuser, Vlricum Roten et dictum Bohi Schlaher opidanos opidi in Wil⁴ ad instantiam Eberlini dicti Holstains de Vberlingen⁵ certas emisimus monitorias litteras, per quas dictos scultetum et suos conreos monuimus et moneri fecimus, ut se a sententiis proscriptionis dicti iudicis provincialis condigne liberarent et absolvi procurarent infra certum terminum videlicet proximos quindecim dies a tempore publicationis et insinuationis dicte amonitionis eis facte. Alioquin, si hoc non facerent, excommunicationi sententialiter subiacerent eosque tamquam tales mandavimus et fecimus publice denuntiari. Deinde vero ex certis rationabilibus causis nobis ex parte dictorum monitorum expositis et nos ad hoc moventibus effectum huiusmodi amonitionis sub forma iuris ad certum competentem terminum videlicet feriam sextam post festum sancti Nicolai episcopi proximam hore prime suspendimus et relaxavimus, ipsumque Eberlinum actorem citavimus et citari fecimus ad dictum terminum ad comparendum cum suis litteris videlicet supplicat(ionis) dicti iudicis provincialis necnon etiam nostras monitorias litteras et ad videndum dictam nostram amonicionem ex causis et documentis coram nobis pro parte dictorum monitorum proponendis et faciendis cassari et revocari vel ad dicendum rationabiliter, si posset, quare hec fieri non deberent, et alias ad procedendum et per nos procedi in et super premissis, prout iustum foret et ordo dictaret iuris. Quo etiam termino adveniente comparuerunt coram nobis in iudicio prefatus Eberlinus actor ex una et discretus Wernherus dictus Zehender doctor puerorum opidi in Wil predicti procurator et nomine procuratorio dictorum reorum ex parte altera. Prefatusque Eberlinus coram nobis exhibuit et produxit litteras tam supplicationis dicti iudicis provincialis et nostras monitorias quam etiam alias litteras ipsius iudicis provincialis eidem Eberlino ab eodem denuo concessas et nobis officiali predicto directas, petivitque per nos dictos monitos et proscriptos retrudi et contra eos in subsidium iurisdictionis dicti iudicis provincialis per graviores sententias et penas procedi. Ex adverso vero prefatus Wernherus procurator et quo supra nomine procuratorio copias huiusmodi litterarum per ipsum Eberlinum actorem productarum sibi decerni et terminum competentem ad ostendendum et proponendum in scriptis causas rationabiles et legitimas, quare ad petita per actorem per nos procedi non deberet saltem de presenti prefigi petivit. Nos vero tunc huiusmodi hincinde propositis et petitis diligenter attentis ipsi Wernhero procuratori quo supra nomine procuratorio copias omnium litterarum per ipsum Eberlinum productarum decrevimus sibique terminum videlicet horam vesperarum ipsius diei hodierne ad proponendum et deducendum huiusmodi causas in scriptis prefiximus et assignavimus. In quo quidem termino prefatus Wernherus procurator et quo supra nomine coram nobis comparens in presencia et audientia dicti Eberlini actoris quasdam coram nobis obtulit exceptiones seu rationes, in quibus inter alia deducebatur, quod ipse Eberlinus, pro quo huiusmodi executio peteretur excommunicationis sententia maiori tam a nobis quam a venerabili patri domino Johanne divina permissione abbate monasterii in Vischinen⁶ ordinis sancti Benedicti iudice et conservatore iurium et privilegiorum venerabilis patris abbatis monasterii sancti Galli dicti ordinis et ut a tali iudice etiam pluribus agravacionibus subsecutis fuisset dudum ac foret et modo esset publice innodatus et involutus. Petivitque se ad huiusmodi deductorum in exceptionibus eisdem probationem admitti. Admisso igitur per nos dicto Wernhero procuratore et quo supra nomine ad probandum huiusmodi excommunicationem per eum propositam et termino iuris ad hoc faciendo prefixo. Post hec vero prefatus Wernherus procurator et quo supra nomine procuratorio die date presencium coram nobis comparuit et litteras excommunicatorum et agravatorum tam a nobis quam a dicto domino abbate monasterii in Vischinen iudice et conservatore predicto contra dictum Eberlinum latas et autenticas in modum probationis etiam in presentia et audientia dicti Eberlini actoris produxit et dictos dominos suos ab instantia nostri iudicii absolvi petivit. Nos autem huiusmodi deductis pro parte dictorum reorum cum diligentia visis et recensitis, contra que etiam per ipsum Eberlinum actorem salubriter rationabile fuit deductum seu exceptum. Quia ipsam excommunicationem pro parte reorum per modum exceptionis contra ipsum actorem propositam adeo legitime et sufficienter invenimus probatam, quod, ut subscribitur, procedere debeamus. Idcirco ipsos reos pro hac vice ab instantia nostri iudicii absolvendos duximus et absolvimus per presentes universis et singulis, ad quos presentes pervenerint, cum salute mandantes, quatinus sic per nos factum esse publicetur et observetur. Datum Const(antie) anno domini millesimo CCC^mo nonagesimo quinto, die sabbati post festum beati Nicolai episcopi, hora vesperarum, indictione tercia.