Wir^a) dis nâchbenempten herren graf Hainrich von Werdenberg herr ze Rinegg¹, graf Rudolff vnd grâf Hug sin sun² veriehent vnd tugint kund allerLmanglichem mit disem offenn brief von des angriffs vnd geltz wegen, das wir vnser herrschafft von Osterrich ietz ze Rinegg genomen vnd entwert L habint, vnd von des vffhutens wegen, als die von Veltkilch³ von der selben sach vnd getât wegen vff mich vorgenanten grâf Hugen gehut hand, L vnd och von aller der sach red vnd werkk wegen, so vmb die selben sach zwuschent vns ze baider syt geschehen vnd verloffen sint, es sig von vns selb ald vnsren helffern vff baiden tailn, das da der erwirdig vnser lieber herr abbt Cun abbt des gotzhus ze sant Gallen⁴ mit vnser wissent vnd och mit vnserm guten willen vnd gunst zwuschent vns vnd inen luterlich beredt vnd getadinget hât, das wir vorgenanten grâfen all drig vnd vnser lieben bruder vnd vettern grâf Albrecht der elter vnd grâf Albrecht der junger von Werdenberg vom Hailgenberg⁵ darzu all ander vnser frund diener vnd helffer, wer ald in welen wirden vnd eren die sint, dero vorgenanten von Veltkilch des ammans des râtz vnd aller iro burger vnd helffer vmb all obgeschriben stoß vnd sachen gut frund wesen sont vnd dz och die sach gantzlich ain guti erberu stati richtung sunung vnd verainung wesen vnd belyben sol ân all gevard. Vnd darvber ze merer sicherhait so habint wir vorbenempten herren all drig graf Hainrich von Werdenberg, grâf Rudolff vnd grâf Hug sin sun fur die obgenanten vnser bruder vnd vettern baid graf Âlbrehten by vnsren guten truwen versprochen gelobent vnd vertrostent mit vrkund dis offenn briefs, das si dis obgedâchten richtung sunung vnd verainung si vnd all ir helffer gen den vorgenanten von Veltkilch vnd allen iren helffern mit vns getrulich haltint in der wyse, als hie vor geschriben stât, ân all gevard. Vnd des alles ze wârem vnd offem vrkunde vnd ze ainer bestaten vesten sicherhait ietz vnd hie nâch so habint wir egenanten grâf Hainrich vnd grâf Rudolff sin sun vnsru insigel fur vns selb fur den obgenanten grâf Hugen, fur die obgedâchten vnser bruder vnd vettern den eltern vnd den jungern grâf Âlbrechten vnd fur all ander vnser frund diener vnd helffer, als vor ist beschaiden, offenlich gehenkt an disen brief, dârvnder ich obgenanter grâf Hug mich willeklich vnd vestklich verbunden hab vnd bind, wôn ich selber noch ze disen ziten aigens insigels nit hab, aller dirr vorgeschribnen tading richtung sunung vnd verainung mit krafft vnd vrkund dis offenn briefs. Darnâch veriehent wir vorgenanter abbt Cun von sant Gallen, das wir dis obgedâchten richtung sunung vnd verainung zwuschent den vorbenempten herren von Werdenberg vnd denen von Veltkilch in der wyse vnd mit den stukken vnd artikkeln, als da vor geschriben stât, luterlich gemachet beredt vnd getadinget habint. Vnd des ze vrkunde ainer gantzen wârhait vnd wârwissenden vesten gezuggnuß so habint wir vnser insigel ôch lâssen henken an disen brief, doch vns vnd vnserm obgenanten^b) gotzhus vnschadlich. Das geschach vnd ward och dirr brief alsuß ze Veltkilch geben des jâres, do man zalt von Cristus geburte druzehenhundert vnd im zwai vnd nuntzgosten jâr, an dem nachsten samstag nâch vnser lieben frowen tag ze ogsten.