Allen den, die disen brief an sehent oder ho^erent lesen, kúnd ich Bertschi Eichholtzer Chůnratz Eichholtzers sun vnd vergich of||fenlich mit disem brief, dz ich in geuangnust lag Zug¹ in der stat von sache wegen, als ich an griffen hat die erbern lúte die || stat vnd den spital ze Rapreswile², sol man wissen, dz o^vch da die erbern bescheidnen lúte der amman vnd der rat vnd die burger || gemeinlich der obgenanten stat Zug dur miner pet willen fúr mich gebetten hant die wisen bescheidnen den vogt vnd den rat vnd die burger gemeinlich der stat ze Rapreswile, dz si mich nv ze mal vss geuangnust gelassen hant, mit dien gedingen, dz ich der stat ze Rapreswile niemmer mer zweijer milen noch komen sol vnd dz ich enkeinen von Rapreswile, er sij burger vss oder inne, noch enkeinen, der zů der stat ho^eret, niemer an griffen sol weder mit gericht noch ane gericht geistliche(m) noch weltliche(m) in enkeiner wise noch mit enkeinen fúnden, die nv erdacht sint oder noch mo^echtin erdacht verden^a), vnd han o^vch des offenlich vff den heilgen gesworn einen rechten gelerten liplichen eit mit vferhabner hant, dis alles stet ze haltenne, so hie vor von mir geschriben stat, were aber, dz ich der vorgeschribner stukken keines v´ber fu^ere vnd es nút stet hette, wo mich denne die vorgenanten der vogt vnd der rat vnd die burger ze Rapreswile oder ieman, der zů in ho^eret, oder ieman anders von ir wegen ergriffe inrent den zwein milen oder vsrent den zwein milen, es si vff dem lant oder in stetten, dz man mich da hin tůn sol, es si mit gericht oder ane gericht, weders si went, als einen verzalten schedlichen man, vnd sol mich da vor nút schirmen weder burger recht noch lantrecht noch frij recht noch enkein funt, der ietz funden ist oder noch mo^echt funden werden. Vnd des ze einem waren offennen vrkún^a) vnd meren sicherheit aller der sache, so hie vor von mir geschriben stat, so hab ich erbetten die obgenanten wisen Wernher Kid amman³ Zug, dz er sin eigen ingesigel an disen brief gehenket hat, vnd o^vch der rat vnd die burger gemeinlich der stat Zug, dz si der stat eigen ingesigel o^vch fúr mich an disen brief gehenket hant, dar vnder ich mich willenklichen binde, das o^vch wir der obgenant amman vnd der rat vnd die burger gemeinlich der stat Zug getan hant v´ns vnd v´nsern erben vnd nachkomen vnschedlich dur des vorgenanten knechtes pet willen Bertschis Eichholzers, vmb dz es nv vnd hie nach kraft hab vnd haben sol, als vor von im geschriben stat. Der geben wart, do man von gottes gebúrt zalt drúzehen hundert jar, dar nach in dem sibenzigosten iar, an sant Matheus tag des heilgen zwelfbotten vnd ewangelisten.

Source Fulltext: Chartularium Sangallense VIII, Nr. 5244, S. 434-435.