Wir^a) Albr. von gots genaden hertzog ze O^esterr(ich) ze Styr ze Kernden vnd ze Krayin herre vf der Windischen March vnd ze Portnow graf ze Habspurg ze Tyrol ze Phyrt vnd ze Kyburg rnarchgraf || ze Purgow vnd lantgrafin Elsazz² veriehen bechennen vnd tůn kunt offenlich mit disem brief, als hie vor se^aliger gede^achtnuzze vnser lieber brůder hertzog Růdolf von O^esterr(ich)³, dem got genade, || ze purchgrafen vogte vnd phleger vf vnser vest vnd vber die stat zů der núwen Raprechtzwil⁴, die ho^ef ze Kentpraten⁵ vnd ze Jonen⁶, die dazů geho^erent, vber die mitteln March⁷, die zů der alten Raprechtz||wile⁸ geho^eret, vber die We^agi⁹ vnd die vogtey zů den Einsidellen¹⁰ mit allen iren zůgeho^erungen gesetzet hat vnsern lieben getrewen Johan von Langenhart¹¹, dem er da hin ze purghůt geordent vnd beschikket hat alle jar zwaihundert guldin vfden stúren cinsen vnd nútzen derselben vogtey vnd phleg, darvf er von dienstes wegen im vnd sinen erben geschlagen hat tusent guldin, also daz wir si da nicht enthausen sullen, e daz wir si derselben tausent guldin berichten vnd bezaln, nach sag dez priefs, den im der egenant vnser brůder selig darv´ber gegeben hat, als ouch derselb vnser brůder selig dem egenanten Johan von Langenhart vnd sinen erben verlihen hat ein ewig purchgrafschaft ze rechtem purglehen vf der egenanten vnser vest Raprechtzwil vnd im dahin zů ewigem purglehen verlihen vnd gesetzet hat viertzig guldin geltes vf den vorgenanten nútzen, vntz daz wir oder vnser erben die von in erlo^esen vmb vierhundert guldin, die si darnach an ligunde gu^eter bewenden vnd von vns ze purglehen haben sullen, ouch nach wisung des priefs, den si darvber von dem egenanten vnserm brůder seligen habent, vnd als ouch der egenant Johans von Langenhart vnd sin erben darvber habent vf den vorgenanten vnsern nútzen viertzig guldin geltes in ains siechten phandes wise als lang, vntz daz wir oder vnser erben die von in erlo^esen ouch mit vierhundert guldin, als der phantbrief seit, den si ouch von vnserm vorgenanten brůder seligen darvber habent, daz wir fúr vns vnd vnsern lieben brůder hertzog Leupolten¹² demselben Johan von Langenhart vnd sinen erben die egenanten drev stuk bestetet haben vnd besteten mit disem brief in aller der mazze, als die egenanten drey brief wisent, die in der vorgenant vnser brůder selig hertzog Růdolf darvber geben hat, ane alle geuerde, Darvber habent an vnsrer stat der erwirdig vnser lieber getrewer kantzler herr Johans pischofze Brichsen¹³ vnd vnser lieber getrewer Albr. von Půchheim, die wir nach rate vnsers rates darzů geschikket haben, an der stat des jares vnd des tages, als diser brief geben ist, ein gantze raitung getan mit dem egenanten Johan von Langenhart vmb ettlich gelihen gelt, daz im der vorgenant vnser brůder selig schuldig was, vnd vmb ettlich roz vnd maiden, die er von im kouft hat, die im noch vnuergolten waren, vnd mit namen vmb den kosten, der gelouffen ist vber den bu der prugg ze Raprechtzwile, die vber den se gemacht ist, vber den bu, den er daselbs an der burg getan hat, vnd vber ettlich ander redlich chost vnd zerung, die er in des egenanten vnsers brůders seligen vnd vnserm dienste gehebt hat, vnd fúr alle die verlust vnd schaden, die er an rozzen vnd maiden vnd andern sachen vntz vf disen húttigen tag in vnserm dienste genomen hat, vnd vmb alle andre stuk von dienstes oder anderr sachen wegen, darvmb er vormals von dem egenanten vnserm brůder seligen hertzog Růdolfen nicht auzgerichtet was. Des ersten hat der egenant Johans von Langenhart vns vnd an vnserr stat die vorgenanten vnsern kantzler vnd den Půchheimer bewiset mit dez egenanten vnsers brůders hertzog Růdolfs seligen priefe, das er im noch schuldig beliben was vmb rozz vnd meiden, die er von im kouft hat, sibentzig guldin. Darnach mit eim andern sinem briefe hat er si bewiset, daz im derselb vnser průder selig gelihens geltes schuldig beliben ist drúhundert guldin, vnd aber darnach mit dem dritten sinem briefe hat er si bewiset, daz derselb vnser brůder selig vnd wir alein von des pawes wegen der langen prugg vber den se ze Raprechtzwil im schuldig sin tusent fúnf vnd zweintzig guldin vnd ein halben guldin. Die summ von den dreyn briefen, die er vns nu wider geben hat, bringet tusent drúhundert núntzig vnd sechsdhalben guldin, die wir im schuldig sein. Da zů hat er ouch den vorgenanten vnsern kantzler vnd den Půchheimer zů vnsern handen bewiset mit rechter vnd erbrer raitung, daz er vber alle die nútze, die von den egenanten sinen ampten vnd phlegen nach den vorgenanten stukken, die er selber darvf hat, gevallen sint vntz vf disen húttigen tag, vzgeben hat zů dem paw vnser vest Raprechtzwile vnd zů andern den vorgenanten stuken zwaihundert nún vnd fúnftzig guldin, vnd also bringet die gantz summ alles des, so wir im nach den egenanten stukken schuldig sin, tusent sechshundert fúnfthalben vnd fúnftzig guldin. Darvmb als der egenant Johans von Langenhart vnd sin erben vormals vor diser raitung von purghůt purglehens vnd slechtes phandes wegen habent in phandes wise vf allen vnsern nútzen in der stat vnd den egenanten vnsern ampten ze Raprechtzwil, in der March, der We^agi, der vogtey zů den Einsidellen vnd swaz zů den egenanten stuken allen geho^eret zwaihundert vnd achtzig guldin ja^erlicher gúlte nach sag der briefen, die si darvber von dem egenanten vnserm brůder seligen habent, also haben wir fúr vns, den vorgenanten vnsern lieben brůder hertzog Lúpolten vnd vnser erben den egenanten Johan von Langenhart vnd sin erben des vorgeschribenn geltes, des wir in ietzunt an diser raitung schuldig beliben sin, gewiset vf die vbrigen nútze, die wir noch vf vnsrer egenanten stat ze Raprechtzwile vnd der múli daselbs, vf allen den egenanten vnsern ampten vnd vf dem wingarten zů der alten Raprechtzwile ledig haben, es si von cinsen stúren vischentzen ve^allen erbscheften gerichten oder bu^ezzen, also daz si die alle gentzlich zů dem gelte, daz si vormals darvffe habent, innemen vnd niezzen sullen alle jar vnuerrait vnd ane allen abschlag, vnd sullen ouch wir noch vnser erben si da nicht enthusen noch von der egenanten phleg vnd vogtey vercheren, e daz wir die egenant phantschaft vmb alle die vorgenanten summen von in gelo^esen nach ditz gegenwúrtigen vnd aller andrer ir brief sag, die si von dem egenanten vnserm brůder seligen darvber habent, als vor geschriben stet. Wir wollen ouch vnd gebieten mit disem brief allen vnsern purgern vnd lúten ze Raprechtzwile vnd in den egenanten vnsern ampten, daz si sweren gehorsam ze sin dem egenanten Johan von Langenhart vnd sinen erben mit allen den egenanten nútzen, die von gerichten oder andern dingen gevallent, vntz daz wir die vorgenant losung von in getůn, also daz ouch si mit irn liben vnd diensten wider allermenlich getrewlich bi vns in dem namen als da vor beliben alle die wile vnd si die egenant vnser behusung vnd phleg von vns inne habent als ander vnser amptlúte phleger vnd diener, ane alle geuerde. Vnd sullen ouch si vns derselben losung stat tůn vnd gehorsam sin, wenne wir die an si vordem, ane alle widerrede vnd geuerde. Ouch sullen si eim ieklichen vnserm lantvogt in Ergo^ew¹⁴, wer der ie zů den ziten ist, sweren, mit der egenanten vnsrer vest vnd der behusung ze Raprechtzwile gewertig vnd gehorsam ze sin zů allen vnsern notdurften wider allermenlich, als oft vns dez not geschieht vnd als ander vnser purchgrafen tůnd, ane alle geuerde. Wir haben ouch vns selber, dem egenanten vnserm brůder vnd vnsrn erben in diser phantschaft vnd allen disen vorgeschriben taydingen auzgenomen wizzentlich vnd vorbehebt alle die lúte vnd gůter, die vnser vordem oder wir andern lúten vormals versetzet haben, die purgerstúr vf vnsern purgern in der stat ze Raprechtzwile, den zol vf der núwen brugg vber den se daselbs, den der vorgenant vnser brůder selig den purgern ze Raprechtzwile zů ettlichen jarziln zů irm paw verschriben vnd geben hat, vnd in derselben stat vnd vf allen den egenanten vnsern lúten vnd ampten alle grozze gerichte vmb den tod, die der egenant von Langenhart vnd sin erben von vns in phleg wis vnuerkúmbert inne haben vnd vns oder vnserm lantvogt in Ergo^ew, wer der ie zů den ziten ist, damitte warten sullen gehorsamlich vnd getrewlich als ander vnser vndervo^egte, wan wir in nicht anders denne die vorgenanten nútze ane dise stuk, die wir vorbehaben vnd an disem brief auznemen, versetzet haben. Vnd dar vf alein vnd nicht verrer sullen in ouch die vorgenanten vnser burger vnd lút sweren, als vor geschriben stet, vnd sullen ouch dar vber einem ieklichem vnserm lantvogt sweren gehorsam ze sin in allen sachen als ander vnser stette in Ergo^ew, wan wir dem egenanten Johan von Langenhart vnd sinen erben alein die vorgenant behusung vnd phleg alein mit den egenanten nútzen ane die, die wir auznemen, verschriben haben, als vor bescheiden ist, ane alle geuerde. Mit vrkúnde ditz briefs, der geben ist ze Wienn an sant Symons vnd sant Judas der heiligen zwelfpotten abent nach Christes geburt tusent drúhundert vnd sechtzig jaren vnd darnach in dem fúnften jare.

Source Fulltext: Chartularium Sangallense VIII, Nr. 5001, S. 186-189.