Allen, die disen gegenw´rtigen brief an sehent oder ho^erent lesen, kúnden wir der prior vnt der conuent || ze den Augustinern ze Costentz in der stat vnt wir dú . . a^ebbtissen vnt der conuent ze Tennikon des || ordens von Zitel in Costentzer bistun, das wir vor dem beschaiden man maister V^olrich dem Linden in schidmans || vnt vsrihters wise ainhellig v´ber ain komen sigent in der missehellung, so wir heton mit an ander von aines selgera^etes wegen, als hie nah gescriben stat, also das wir die vorbenemt a^ebbtissen vnt der conuent veriehen, das wir von Wernhers des Hundes sa^eligen wegen ab dem hof ze Obernhofstetten súlen ja^erlichen vnd vnuerzogenlichen geben den erbern gaischlichen vorbenemten herren den Augustinern ze Costentz vierzehenthalben schilling gůter Costentzer múnse entzw´schen sant Gallen vnd sant Martins misse, es wa^eri denne, das von hagel rob v´rlúg brande oder von gemainem lant gebresten so merklicher geprest wrd vf dem vorgenanten hof, das wir erkanden bi v´nser gewisseni vnd och es fúr mugen bringen, das wir das e genant selgera^et gantzlichen nit mo^ehtin gerihten, so son wir nah massung des gepresten als vil dester minder geben phenning vf das vorbenemt zil, als wir got dar vmb bi gůter gewissini wellint anwrten vnd och als wir, tůt ez not, in der kuntschaft baidú gepresten vnd massung des abschlags wellen redelich vnt kuntlich machen. Es^a) sint och in die vorbenemten vierzehendhalben schilling phenning geraitet vnt ho^erent dar zů die nún schilling, die da stant an der altun hantuesti, die die vorbenemten Agustiner hant von des vorgenanten Wernhers des Hundes wegen, also das von der nún schilling wegen der vorbenemter vnt fúnfhalbes schillings, die in och der vorgenant Wernher ab dem vorbenemtem hof satz, also das es als mit an ander vierzehenthalber schilling wirt, vnt swenne wir inen ja^erliches rihten vierzehendhalben schilling, als vor gescriben ist, so hant sú mit v´ns nút mer ze schaffen noch mit dem hof^a). Wir der ebenemt prior vnt der conuent veriehen och an disem brief, das v´ns an dirre gegenw´rtiger vergiht vnd gelúpt wol wil benu^egen vnt das wir dis vorbenemt vsrihtung sta^et wellin haben fúr v´ns vnd fúr v´nser nachkomen, also das v´ns dirre brief vnscha^edelich sol sin an dem gemainen brief, den wir von in haben in andren stuken an dis, das hie benemt ist. Vnt ze ainem gewa^erem vrkúnde ainer sta^eten rihtunge dirre sache habin wir der vorgenant prior vnd der conuent, wir die vorgenant a^ebbtissen vnt der conuent, habin v´nser baider conuent insigel an disen brief gehenket. Ich der vorgenant maister V^olrich der Linde von ir baider bette willen hab och min insigel ze ainer sicherlichen sta^etekait dar an gehenket. Dis beschach vnd ist dirre brief geben, do man von Cristes gebúrt zalte drúzehenhundert jar, dar nach in dem aht vnd drissigosten jar, an sant Mathias abunt des zwelfbotten.

Source Fulltext: Chartularium Sangallense VI, Nr. 3679a, S. 527.