Wir Hainrich von gottes gnaden bischof ze Costentz tůnd kunt allen den, die disen brief ansehent lesent alder ho^er||rent lesen, dz fúr v´ns kamend ze Costentz in der stat der veste ritter her Eberh. von Sultzberg vnd vrôw Vrsella sin || êlichú wirtin ainhalb vnd Gerwig Bla^vrrer burger ze Costentz anderthalb, vnd sassen wir ze gerichte, do stůnd der vorgenant von || Sultzberg mit fúrsprechen vnd verkúndet vor v´ns vnd vor gericht, er wolte den hofe ze Ahe vnd den zehenden ze dem dorfe ze Ahe, dar vf vnd da mit sin egenant vrôw Vrsell. ir hainstúr von irme vatter hern Albr. von Haidelberg berichtet vnd bewiset wa^ere vnd das von v´ns vnd v´nserm gotzhus ze Costentz lehen ist, mit v´nserm willen vnd mit v´nserr hant verko^vffen vnd ze ko^vffende gen dem egenanten Gerwig Bla^vrrer vnd sinen erben ains rechten ewigen ko^vffes vmb hundert sibentzig vnd fúnf phunt gůter vnd ga^eber Costentzer phenning, vnd bat im ze eruarn, wie er das geta^et nah recht, dz es kraft hetti vnd dz der^a) egenant Gerwig Bla^vrrer vnd sin erben von der vorgenanten vrow^b) Vrselen vnd iren erben an dem selben ko^vffe nit bekúmbert wurdent, do wart ertaild mit gemainer vrteil, daz er siner vrowen Vrsell. ainen andern vogt gebe vnd dz si denn mit dem vollefůrti, wz ir ze willen weri vmb dz vorgenant verko^vffen. Dis geschah vnd gab da her Eberh. von Sultzberg vorgenanter vrô Vrselen siner elichen wirtin nah vrtail ze vogt Hainr. Tettikouer den iungern burgern ze Costentz, des si můtet vnd den willenklichen genam. Der selb Hainr. Tettikouer stůnd do dar mit der egenanten vrô Vrsell., der vogt er wz, vnd bat sinen fúrsprechen eruaren, wie die vorgenant vrôw Vrsell das egedacht verkoffen mir irem egenanten wirt hern Eberh. von Sultzberg vollefu^eren solti, dz es kraft hetti. Do wart ertailt, dz ir vogt, der ir vor gericht geben weri, si dristunt vs fu^eren solti vnd eruarn von ir, ob si dz vorgenant verko^vffen willenklich vnd vnbetwungenlich tůn vnd verhengen wolti. Dis beschah dristent, vnd kam der vorgenant Hainr. Tettikouer ze ie dem mal wider in fúr gericht vnd sait, alz ertailt wz, vf sinen ait, dz si es willeklich vnd vnbetwunglich ta^eti. Dar nah batent v´ns die vorgenanten her Eberh. vnd vro^vw Vrsell mit Hainr. Tettikouer irem vogt, dz wir vnsern willen vnd gunst ta^eten zů dem verko^vffen, alz vor beschaiden ist, dz tâten wir, vnd verko^vften da ze stette die vorgeschriben her Eberh. vnd vro^v Vrsell nach willen vnd ra^vt irs vogtes Hainr. Tettikouers vorgen(ant) den hof vnd den zehenden, alz sú vor genemmet sint, vnd gabent ze koffende zů ainem geweren vnd ewigen ko^vffe dem vorgenanten Gerwig Bla^vrrer vnd allen sinen erben vmb hundert sibentzig vnd fúnf phunt phenning, alz vor beschaiden ist, der sú volleklich gewert sint, des si vor v´ns vnd vor gericht veriahen. Vnd beschah dis mit vnserr hant willen vnd wissen mit allen worten geba^erden vnd geta^eten, alz es von recht ald von gewonhait kraft hat ald haben mag. Es swůr och die egenant vrôw Vrsell ainen gelerten ait ze den hailigen, dz si vnd ir erben den^c) vorgenanten Bla^vrrer vnd sine^d) erben an dem vorgenanten ko^vffe niemer geirren noch bekúmbern solti mit dehainen gerichten gaistlichen ald weltlichem noch mit dehainen dingen, da mit dirre koffe gehindert ald widersprochen mo^echti werden, an alle geuerd. Vnd ze wa^vrem stêtem vnd vesten vrkúnde aller dirre vorgeschribenn dinge so hant wir v´nser ingesigel gehenket an disen brief. Wir Eberh. Von Sultzberg vnd Hainr. Tettikouer vorgen(ant) veriehent aller vorgeschribener dinge, dz sú recht vnd redelich vollefu^ert sint, alz hie vor geschriben sta^vt. Vnd ze merer sicherhait henken wir fúr v´ns vnd fúr die vorgenemten vro^v Vrsell. vnd fúr alle v´nser vnd ir erben vnserú ingesigel an disen^e) brief. Der geben wart des jares, do man zalte von gottes gebúrt drúzehen hundert fúnftzig vnd acht jar, dar nah an dem nechsten zinstag nach sant Agnesen tage.

Source Fulltext: Chartularium Sangallense VII, Nr. 4522, S. 368-369.