Ich Cv^onrat Phefferhart stattamman ze Costentz¹ tůn kunt allen, die disen brief ansehent oder || ho^erent lesen, daz Burchart der A^eker mins herren von sant Gallen² gewisser bot fúr mich kam || fúr geriht vnd klegt an mins herren des abbtes stat von sant Gallen ze Johansen dem Spalter || burger ze Costentz, vnd sprach mit fúrsprechen, der selb Johans der Spalter horti von dem libe an den obgenanten minen herren von sant Gallen vnd an sin gotzhus, vnd bat gerihtes ze im vmb dienst, des a^entw´rt der obgenant Johans der Spalter mit fúrsprechen vnd sprach, er horti an daz gotzhus ze Vischinen³, vnd bat tags, daz ers siner herschaft verkunti, den tag gab inen baiden, als vrtailt wart, zů dem selben tag kament si och baide, do stalt Johans der Spalter Bertolten Sta^ehillin von Bettwisen⁴ dar, der zogt offen vrkúnd⁵, daz er mins herren des abbtes von Vischinen gew´sse bot wa^er, do ward Johansen dem Spalter ertailt, daz er in růwen sa^ess, vntz daz die herscheft mit ain ander gerehtetint. Do sprach aber Burchart der A^eker mit fúrsprechen, der vorgenant Johans der Spalter horti von dem libe an minen herren von sant Gallen vnd an sin gotzhus, vnd bat, daz ich mins herren botschaft von Vischinen vnder wisti, daz er in an dem selben Johansen dem Spalter vngemu^et liesse. Des a^entw´rt der egenant Bertolt Sta^ehilli mit fúrsprechen vnd sprach, Johansen des Spalters vatter horti an das gotzhus ze Vischinen von dem libe, vnd wer im des vergessen welt, so welt er in besetzen nu vnd ze tagen, als im vrtail ga^ebe, vnd getrúweti ze got vnd dem rehten, sid dú gotzhúser den wehsel mit ain ander hettint, daz denn des alten Spalters elichú wirtin vnd der obgenant Johans iro sun billich dem alten Spalter nach hortint⁶. Da fraget ich der vorgenant amman vrtail vmb, do ward ertailt mit reht gesamnoter vrtail, wa der egenant Bertolt Sta^ehilli war macheti mit zwain erbern mannen ald mit ainem man vnd mit ainer frowen ald mit zwain frowan, die vnuersprochen lút vnd můter ma^vg wa^erint vnd die sippe geraiten kundint, die wissetint, daz der alt Spalter horti an daz gotzhus ze Vischinen, daz er des billich genusse. Daz braht och der vorgenant Bertolt Sta^ehilli fúr, als im ertailt wart, vnd machot da vor geriht war mit zwain erbern vnuersprochnen mannen, das der alt Spalter horti an das gotzhus ze Vischinen. Do ward ertailt mit gesamnoter vrtail, daz der vorgenant Johans der Spalter sinem vatter billich nach horti vnd daz in min herre der abbt von Vischinen behaben het vnd daz der selb Spalter von minem herren von sant Gallen vnd von siner botschaft billich ledig wa^ere. Vnd ze offem vrkúnd der warhait aller diser vor geschribner dinge gib ich der vorgenant amman min insigel an disen brief. Der ist ze Costentz geben, do man von Cristes geburt zalte drúzehenhundert jar, dar nach in dem siben vnd fúnffzigosten jar, an der na^ehsten mitwochen vor sant Martins tag.

Source Fulltext: Chartularium Sangallense VII, Nr. 4509, S. 356-357.