Ich Berhtholt Zimer burger ze Raprehtswil¹ vergich fúr mich vnd fúr alle min erben allen den, die disen brief lesend oder || ho^erend lesen, das ich gesundz libs vnd můtz mit gůtem rat vnd mit gůter betrahtung frilich vnd vnbezwngenlich han || geben ze koufend ains rehten redlichen koufs den erberen gaislichen herren dem abbet vnd dem conuent des gotzhus ze || Rúti² Premonstren ordens min wis, diú gelegen ist zem hof ze Tegerno^vwe³ vf dem Tierbu^eel⁴, vmb sechs pfunt núwer pfening Zúricher múns, der ich von inen gar vnd genzlich gewert bin vnd in min redlichen nuze bekeret vnd bewendet sint, vnd darumb so verzihe ich mich fúr mich vnd fúr min erben aller der reht vnd aller der ansprach, so ich oder min erben an die euerschribnen wis iezo haigend oder imerme hernach gehan mo^ehtend an gaislichem oder an weltlichem geriht. Ich han ouch den egenanten herren dem abbet vnd dem conuent des egenanten gotzhus ze Rúti die euerschribnen wis geben ze koufend fúr ain reht ledig aigen vnd han sie inen darzů vfgeben vnd geuertget vor dem vogt vnd vor dem rat der stat ze Raprehtswil, als geriht vnd vrtail braht, vnd han ouch das getan mit worten mit werken vnd mit allen geta^eten, die darzů horten, das die egenanten den vogt vnd den rat der stat ze Raprehtswil duhte, das es kraft vnd maht het vnd ouch billich hernach han so^elt, ich loben ouch an disem brief, dis koufs vnd der selben wise wer ze sind nach reht fúr ain reht ledig aigen, wenne vnd wa man sin bedarf, vnd das dir euerschribern kouf war sige vnd sicher vnd sta^et belib, darumb so gib ich der egenant Berhtholt Zimer fúr mich vnd fúr min erben den egenanten gaislichen herren dem abbet vnd dem conuent des egenanten gotzhus ze Rúti vnd iren nachkumenden zem egenanten gotzhus disen brief besigelt mit der stet insigel ze Raprehtswil, wan ich da burger bin, das wir die egenanten der vogt vnd der rat der stat ze Raprehtswil durch bet der egenanto gaislicher herro des abbetz vnd des conuentz des gotzhus ze Rúti vnd ouch durch bet des egenanten Berhtholtz Zimers iúnser mitburger zů aim vrkúnd ainr warhait gehenkt habend an disen brief, vnder dem wir ouch veriehen, das disiú euerschriben vfgebung vnd vertgung der euerschribnen wise vor iúns beschehen ist, als geriht vnd vrtail braht vnd als ouch vor verschriben stat. Dir euerschribern kouf beschach vnd ward ouch dir brief geben ze Raprehtswil in der stat in dem jar, do man zalt von gottes gebúrt drúzehenhundert jar vnd fúnfzig jar, darnach in dem sehsten jar, an dem na^ehsten zinstag nach sant Nicolaus tag.

Source Fulltext: Chartularium Sangallense VII, Nr. 4456, S. 305.