Allen, die disen gegenwúrtigen brief ansehent alder ho^erent lesen, kv´nden wir Hainrich Lifi der alt vnd sin sv´n baide Symon vnd Ffrântz || Lifin gebrůder burger ze Costentz vnd vergehin des offenlich an disem brief, das wir alle drye gemainlich mit gůtem willen vnd mit gůter vorbetrachtvng || nach v´nser gůter frv´nde vnd ander erber lúte rate dem beschaiden man Albrehten dem Blarrer burger ze Costentz vnd sinen erben haben ze koffent || geben reht vnd redelich vnd ains rehten koffes das gůt, das wir hatten ze Albisperg¹, hus vnd hofraiti, was wir da hatten vnd was darzů ho^ert, es sie mit wasen, mit zwi, mitt wisan, mit akkern, mit waide, mit holtz, mit velde vnd mit allen anderen rehten vnd zů geho^erden, als das selb gůt an v´ns komen vnd braht ist vnd als wir es gehebt vnd genossen haben her vntz an disen hv´ttigen tag, also haben och wir im das selb gůt ze koffent geben vmb^a) drissek pfvnt pfenninge gůter vnd gnemer Costentzer mv´ns vnd sigin och der gar von im gewert vnd sint in v´nser redelichen nûtz komen vnd bekert, als wir vergehin mit disem brief. Vnd haben im och das selb gůt von dem erwirdigen herren abt Hermans des gotzhus ze sant Gallen² hant, von dem das selb gůt lehen ist, gefertigot vnd vffgeben mit allen den worten werken vnd geta^eten, so darzů hôrt vnd notdúrftig was nach gewonhait vnd nach reht, vnd haben v´ns^a) darv´ber verzigen vnd verzihen v´ns alle drye willeclich vnd offenlich mit disem brief fúr v´ns vnd fúr alle v´nser erben vnd nachkomen gen dem obgenanten Albrehten dem Blarrer vnd gen allen sinen erben vnd nachkomen aller aigenschaft, aller lehenschaft, aller vorderv^ng, aller ansprach, alles schirmes, alles vszugs vnd alles rehtz, gaischelichs vnd weltlichs gerihtz, da mit wir das selb gůt kv´ndin ald mo^ehtin angesprechen. Vnd wa^er, das im das selb gůt ieman anspra^ech mit gaischelichem ald mit weltlichem geriht fúr aigen ald fúr lehen ald mit dekainer ander ansprach, des so^elin wir vnd v´nser erben in vnd sin erben verstan vnd versprechen vnd des ir reht wern sin nach reht âne geuerde. Vnd ze warem vnd offeme vrkv´nd vnd sta^eter sicherhait aller dirre vorgeschriben dinge geben wir die selben Hainrich Lifi der alt vnd baide sin sv´n Symon vnd Ffrantz Lifin gebrůder v´nserv´ insigel an disen brief. Der ist ze Costentz geben, do man von Cristes gebúrt zalt drv´zehenhvndert jar, darnach in dem ffv´nf vnd ffv´nfzigosten jar, an dem nehsten ma^entag vor mittem aberellen.

Source Fulltext: Chartularium Sangallense VII, Nr. 4400, S. 260-261.