Wir^a) Fides von gottes genaden eptischin des gotzhus Zúrich¹ sant Benedicten ordens in Costentzer bistům kúnden || allen, die disen brief sehent oder ho^erend lesen, daz swester Geppa Kůgatin von Zúrich mit Hug Krieg ir o^ehen vnd rechten vogtes || hant ir hus mit der hofstat vnd mit dem garten hinder dem hus vnd mit allem recht, so dar zů geho^eret, dz Zúrich in der || meren stat gelegen ist an der gassen vor den Barfůssen² v´ber, zw´schent der hus von Opficon³ vnd zw´schent Heinr. hus von Wallis⁴, vnd erbe ist von vnserm gotzhus vmb einen Zúricher pfenning jerlich ze des heiligen crúces tult ze herbst da von ze gebenne^b), frilich vnd ledeklich mit gesundem lip durch got vnd durch ir sele heiles willen vf gab an vnser hant, vnd bat v´ns dz selbe hus vnd hofstat mit allem recht, so dar zů geho^ert, ze lichenn den geistlichen frowen der eptischinn vnd dem convent des gotzhus ze Wrmspach⁵ des ordens von Cytels in Costentzer bistům, vnd durch ir vnd ir vogtes bêtte so haben wir daz vorgenant hus vnd hofstat mit allem recht, so dar zů geho^ert, dien egenanden frowen der eptyschinn vnd dem convent gemeinlich des obgenanden gotzhus von Wrmspach vnd ir nachkomen verlihen ze einem rechten erbe von vnserm gotteshus vmb den vorgeschribenn(en) cins. O^vch hat dú vorgenant swester Geppa Kůgatin mit dem egenanden ir rechten vogte sich verzigen fúr sich vnd ir erben, die si her zů bindet, aller rechtung vordrung vnd ansprach, so si nach dem egenanden hus vnd hofstat vnd nach allen den rechten, so dar zů geho^ert, gen den egenanden geistlichen frowen oder gen ir nachkomen vor gerichten geistlichen oder weltlichen oder mit dekeinen anderen sachen dekein wis iemer gewinnen mo^echte. O^vch hat si globt vnd bindet ir erben vnd nachkomen festeklich her zů, des vorgenanden hus vnd hofstat mit dem garten vnd mit allem recht, so dar zů geho^eret, wer ze sinn nach recht der egenanden geistlichen frowen der eptischenn vnd des conventes des gotteshus von Wrmspach vnd ir nachkomen fúr ein recht erb von vnserm gotzhus vmb den vorgeschribenn cins an allen stetten, wa oder wenn^c) man sin bedarf. Vnd her v´ber ze einem offenn(en) vrkúnd geben wir disen brief durch ir beider bêtte willen, vnsers gotzhus cinsen vnd rechten vnschedlich, mit vnserm insigel offenlich besigelt. Dis geschach Zúrich in vnserm hof, an dem nechsten mentag vor dem palmtag in dem jare, do man zalt von gottes gebúrt drúzehen hundert vnd viertzig jar, dar nach in dem núnden jare. Hie bi warend brůder Johans von Mengen⁶ prior ze Wettingen⁷, brůder Heinrich von Pfortzhein⁸ convent brůder ze Wettingen, Růdolfus der stat Zúrich schriber, Ru^od. Herdiner, Heinr. Krieg, Hartman Rordorf, V^olr. Steiner vnd ander erber lúte.

Source Fulltext: Chartularium Sangallense VII, Nr. 4114, S. 43-44.