Wir Ludowig von gotes genaden Ro^emischer keiser ze allen ziten merer des richs enbieten^a) || den wisen lu^eten . . dem amman dem rat vnd den burgern gemeinlichen ze Rauenspurg¹ vnsern || lieben getriwen vnser huld vnd alles gůt. Es ist bei vns gewesen vnser sun hertzog Stephan² vnd hat || vns gesagt, daz die nu^en, die v^eber den lantfrid gesetzzt sind³, ertailt haben, do ir vnd ander stet nu bei einander ze V^olm⁴ seit gewesen, daz man den steten, die der von Habsburg⁵ beraubt hat, mit dem lantfrid beholfen sull sein, wan es ein frischiu ta^vt sei. Nu wizzt i^er wol, daz die nu^en vor gesprochen vnd vf ir [ayd]^b) erteilt habent, daz man vns von des richs wegen vf die grafen von Veltkirchen⁶ gen Kurwalhen⁷ mit dem lantfrid helfen solt, vnd die selben hilf gehiezzt ir vns ze tůn, do ir vnd ander stet nu bei vns ze Mu^enchen seit gewesen. Biten wir vnd manen iuch der triwon, der ir vns vnd dem rich schuldig seit, [daz]^b) ir mit nichtin lazzet, ir sendet zwen oder drei auz iwerm rat mit vollem gewalt vf die nechsten mitwochen vor dem pfingstag zů vnserm sun hertzog Stephan gen V^olme, vnd daz ir da mit im ze rat werdet, wie vnser sache vnd auch die iwer ein ende vnd furganch gewinne, wan wir in geheizzen haben, daz er mit iw^e mit seinen helfern und diener[n]^b) vf den von Habsburg ziehen sol, vnd daz ir dan dar nach des selben [ge]uertes^b), swenn ir geendet habt, mit im gen Kurwalhen zieht vnd vart vnd i^ew sogtan ernste zů vnsern sachen nemt, daz wir iw^e des immer ze danchen haben. Wa^er auch, daz der auszog vnd die hilf vf den von Habsburg nicht fu^erganch gewu^enn, so getraw^on wir iw^e wol, daz ir vns dannoch gen Ku^erwalhen dient, als wir iuch vor gebeten haben vnd als ir vns geheizzen habt. Geben ze Mu^enchen, an sand Waltpurgen tag.

Quelle Volltext: Chartularium Sangallense VI, Nr. 3922, S. 470-471.