In gottes namen amen. Wir Herman von gottes vnd des stůls gnâden ze Rôme besta^eter abt || des gotzhus ze sante Gallen¹ kúnden vnd veriehen offenlich an disem brieue fúr v´ns vnd fúr alle v´nser nahkomen || allen, die in ansehent lesent oder ho^erent lesen, das wir ansehen vnd angesehen haben grôsse vnd sta^ete trúwe vnd || dankna^eme dienste, die v´ns vnd v´nserm gotzhus die beschaiden lúte Cůnrat der Strâsman vnd Růdolf sin sun willeklich tůnt vnd getân hant vnd noch tůn mugen. Dauon^a) lihen wir vnd geben in vnd allen den kinden, dú von in iemer geborn werdent, tohtran vnd sún, frîges burgerreht in v´nser stat ze sante Gallen vnd da vor, wâ das ist, vnd haben in das gelihen lûterlich willeklich vnd frîlich mit aller frîhait, mit aller gewonhait, mit allen vnd vollen rehten, so darzů nôtdúrftig ist vnd als es mit den selben worten beschlossen ist vnd beuangen, also das sú das selb frîges burgerreht von v´nser gâbe, die wir in daran tu^egen vnd getân haben, volleklich haben son von v´ns vnd von allen v´nsren nahkomen, wâ sú denne seshaft sint, in allem dem reht vnd in aller gewonhait, als es ander lúte vnd burger in v´nser stat ze sante Gallen ald dauor hant vnd als vntz her vngeuârlich behalten ist. Wir haben ouch gelobt den selben Cůnrat dem Strâsman vnd Růdolfen sinem sun, das wir noch kain v´nser nahkomen sú vnd irú kint an dem selben burgerreht nút irren súlin mit dekainen dingen. Wir súlin sú an ir leben vnd an ir tôde daran mit allen dingen behalten. Vnd darvmb das dis wâr sie vnd sta^et vnd vnwandelbar belibe, so henken wir v´nser insigel an disen brief. Der geben wârd ze sante Gallen in der stat, do man zalt von gottes geburt drúzehenhundert jâr, darnah in dem ahtvnddrîssegosten jâr, ze inga^entem mertzen, da ze gegen waren dis êrsamen lúte Cůnrat von Grîffenstain frîge², herr Lútolt der Schenk von Landegge³ ritter, Růdolf der Gyel von Glatburg⁴, Johans der Entziswiler, Johans, Hainrich die Burgower, Cůrat La^ebi, Wa^elti Cristan, der alt Stokman vnd Gerwig Veldli vnd ander êrber lúte vil.

Source Fulltext: Chartularium Sangallense VI, Nr. 3680*, S. 272-273.