Venerabili fratri episcopo Basiliensi¹ et dilectis filiis . .^a) preposito ecclesie Curiensis² ac . . plebano plebis sancti Stephani Constanciensis³ salutem. Gravem querimoniam dilecti filii . . procuratoris ordinis Cisterciensis pro parte dilectorum filiorum universorum abbatum et conventuum monasteriorum dicti ordinis in partibus Alamanie consistencium recepimus continentem, quod cum nuper dilectus filius Conradus abbas monasterii in Salem⁴ eiusdem ordinis Constanciensis diocesis pro quibusdam arduis negociis suis et abbatum et conventuum predictorum in Romana curia promovendis arripuisset iter ad nostram presenciam veniendi, Walterus dictus Mayger de Altstete⁵ rector ecclesie in Celle⁶, Johannes de Sternekke⁷ miles et Wilhelmus de Luterberc⁸ armiger dicte diocesis cum quibusdam aliis suis in hac parte complicibus et fauctoribus instructis latenter insidiis, quas idem abbas minime formidabat, ausu sacrilego in eundem abbatem usque ad effusionem sanguinis manus iniecerunt dei timore postposito temere violentas ipsumque personaliter ceperunt ac quinque equis et aliis bonis et rebus suis^b) ad valorem sexaginta marcharum argenti vel circa spoliarunt eumque per montes et^c) devia de dicta Constanciensi diocesi extrahentes ad Curiensem diocesim⁹ deduxerunt et in ea carcerali custodie manciparunt eundem et per decem ebdomadas vel circa tenuerunt ipsum carceri mancipatum, quousque quod pro liberatione sua quandam pecunie quantitatem infra certum tempus eis solveret et quod de premissis querimoniam non deponeret nec res^d) sibi ablatas huiusmodi repeteret quodque absolutionem ab excomunicatione, quam dicti sacrilegi pro premissis incurrerant, eis a sede apostolica impetraret, iuramentum prestitit sacrilegis memoratis per vim et metum, qui cadere poterat in constantem. Cum igitur ea, que vi metusque causa fiunt, carere debeant robore firmitatis, discretioni vestre per apostolica scripta mandamus, quatenus vos vel duo aut unus vestrum per vos vel alium seu alios, si simpliciter et de piano sine strepitu et figura iudicii vobis constiterit ita esse, auctoritate nostra iuramentum huiusmodi relaxetis et sacrilegos complices et fauctores predictos tam diu excomunicatos publice nuncietis et faciatis ab omnibus arcius^e) evitari, donec prefato abbati res et bona predicta sibi ablata restituerint et de huiusmodi iniuriis satisfecerint competenter et cum vestrarum testimonio litterarum ad sedem predictam venerint absolvendi, eosdem sacrilegos complices et fautores nichilominus ad restituendum cum integritate dicto abbati res et bona predicta necnon contradictores quoslibet per censuram ecclesiasticam appellatione postposita compescendo. Testes autem, qui fuerint nominati, si se gratia odio vel timore subtraxerint, censura simili appellatione cessante compellatis veritati testimonium perhibere. Non obstantibus^f) tamen felicis recordationis Bonifacii pape VIII. predecessoris nostri qua cavetur, ne aliquis extra suam civitatem et diocesim nisi in certis exeptis^g) casibus et in illis ultra unam dietam a fine sue diocesis ad iudicium evocetur, seu ne iudices a sede deputati predicta extra civitatem et diocesim, in quibus deputati fuerint, de causis sibi commissis cognoscere seu alii vel aliis extra illas vices suas committere aut aliquos ultra unam dietam a fine diocesis eorundem trahere presumant, dummodo ultra duas dietas aliquis extra suam civitatem et diocesim auctoritate presencium non trahatur, quam aliis quibuscumque constitutionibus a predecessoribus nostris Romanis pontificibus editis, per que huiusmodi vestre^h) iurisdictionis explicatio posset quomodolibet impediri, seu si aliquibus comuniter vel divisim a predicta sit sede indultum, quod interdici suspendi vel excomunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem. Datum Auinione idus augusti anno tertio.

Source Fulltext: Chartularium Sangallense VI, Nr. 3670, S. 265-266.