Allen, die disen gegenwúrtigen brief ansehent alder ho^erent lesen, kúnden wir Růdolf vnd Cůnrat Hainrichs sa^eligen sv´n || von Kriesservn¹ vnd veriehin dez offenlich an disem brieue, daz wir mit den êrwirdigen herren . . dem abt vnd dem conuente || des gotzhus ze Salmenswille² des ordens ze Zîtel gelegen in Costenzer bistům lieplich vnd gu^etlich beriht sigin vnd vberain^a) || vmb alle die ansprach vnd vmb allv´ dv´ reht, dv´ wir hatten ald wanden han an Ru^efen Mâten³ oberent A^ellen hus bi dem Rîn⁴ vnd ir Jugger⁵ gůt vnd an Jugger gůt also, daz wir fúr alle dieselben ansprach vnd fúr a^ellv´ dv´ selben reht, dv´ wir dar an wanden han, willeclich vnd vnbetwngenlich von inen enphangen haben fúnf phvnt pfenninge Costenzer múns, vnd sigin och der gar von inen gewert, vnd sint in v´nsern redelichen nutz komen vnd bewent, vnd haben v´ns dar v´ber verzigen vnd verzihin v´ns an disem brieue mit geswornen aiden fúr vúns vnd alle v´nser erben gen den vorgenanten herren vnd gen ir gotzhus vnd gen allen ir nachkomen alles des rehtes vnd aller der ansprach, so wir an der vorgenanten Ru^efen Matten vnd an der Jugger gůt vnd swaz darzv^o ho^ert, hatten ald wanden han ald von dekainen dingen iemmer gewinnen mo^ehtin von dekainer slaht geriht alder reht gaischelichem ald weltlichem. Wir haben och in die vorgenanten ait genomen, daz wir baide gemainlich vnd vnuerschaidenlich vndvnser erben der vorgenanten gu^eter, dv´ wir inen angesprochen hant, ir vnd ir nachkomen reht wem sin so^elin gen menlichem fúr ain reht ledig frîes aigen nach reht, wa ez in notdúrftig ist. Dez sint och erber gezúg Cůnrat der A^etti, Cůnrat von Muntigel⁶, Hainrich der amman von Platten⁷, Hainr. der Lo^eln, Cůnrat der Bischof, Růdolf der Kolbe vnd ander erber lúte vil. Vnd ze warem vnd offenne vrkúnde vnd sta^eter sicherhait aller dirre dinge geben wir den vorgenanten herren von Salmenswille dar v´ber diesen brief mit des êrwirdigen ritters hern Burkartes von Rameswag⁸ insigel besigelten. Ich der selbe her Burkart von Ramenswag durch bette der vorgenanten Růdolfs vnd Cůnrates von Kriesserun habe min insigel ze vrkúnde der warhait aller der selben dinge gehenket an disen brief. Der ist ze Costentz geben, do man von Cristes gebúrt zalte drúzehenhundert jar, dar nach in dem siben vnd drissigosten jar, an dem nehsten vritage nach sant Gregoryen tag.

Source Fulltext: Chartularium Sangallense VI, Nr. 3655, S. 256.