+ Johannes + episcopus servus servorum dei dilectis in Christo filiabus . . priorisse et conventui monasterii in || Ambruele¹ iuxta ripam Swartzenbach² apud sanctum Gallum per priorissam soliti gubernari ordinis sancti || Augustini Constanciensis diocesis salutem et apostolicam benedictionem. Cum a nobis petitur, quod iustum est et honestum, || tam vigor equitatis quam ordo exigit rationis, ut id per solicitudinem officii nostri ad debitum perducatur effectum. Eapropter dilecte in Christo filie vestris iustis postulationibus grato concurrentes assensu personas vestras et locum, in quo divino estis obsequio mancipate, cum omnibus bonis, que impresentiarum rationabiliter possidetis aut in futurum prestante domino iuste poteritis adipisci, sub beati Petri atque nostra protectione suscipimus, specialiter autem terras, domos, possessiones, vineas, prata et alia bona vestra omnia, sicut ea iuste et pacifice obtinetis, vobis et per vos eidem vestro monasterio auctoritate apostolica confirmamus et presentis scripti patrocinio communimus. Nulli ergo omnino hominum liceat hanc paginam nostre protectionis et confirmationis infringere vel ei ausu temerario contraire. Siquis autem hoc attemptare presumpserit, indignationem omnipotentis dei et beatorum Petri et Pauli apostolorum eius se noverit incursurum. Dat. Auinione, XVIII kl. iulii, pontificatus nostri anno decimoseptimo.

Source Fulltext: Chartularium Sangallense VI, Nr. 3518, S. 158-159.