Dem erwirdigen fursten vnserm gena^edigen herren abt Hainrich von gottes genaden dez gotz||huses ze^a) sant Gallen enbietent wir Eberhart ritter vnd Hiltbolt gebrůder von Bichelnse || vnd Johans von Lantsperg vnsern willigen dienst, als wir von reht sont. Vil lieber herre, || wir hant da her als getruwe trager dem gotzhuse ze Ta^ennikon grawes ordens in Costenzer bistům daz gůt vnd den hôf, dem man sprichet ze Hiltilishusen, getrulichen getragen, daz selb gůt vnd den hôf mit allem reht, als wir du gehebt vnd getragen habin dem vorgenanten gotzhuse, sendin vnd gebin wir vch můtwilleclichen vnd mit guter betrahtvnge frilichen vf an vwer hant durch bette der a^ebtischenne vnd der samenunge dez vor geschriben gotzhuse ze Ta^ennikon, vnd||
bittent vch flisseclichen, daz ir mit dem hof vnd mit dem gůt tu^egint nach dez selben gotzhuse ze Ta^ennikon nûtz vnd notdurft^b) nah bette vnd vorderunge der a^ebtischenne vnd der samenunge. Vnd daz diz war si vnd an wandelunge vnser vnd vnserre nah comen, so sendent wir vch vnd allen den, die nu ald hie nach dise sache trift ald treffen mag, disen brief besigelt mit vnsern insigeln. Der wart gegeben ze Ta^ennikon dem||
vorgenanten closter, do man zalt von gottez geburtte druzehen hundert jar, dar nach in dem sibenzehenden jâr, an dem na^ehsten sunnentage nah alr manne vasenaht.

Source Fulltext: Chartularium Sangallense V, Nr. 2988, S. 316.