Wir Elsbethe von gottes gnaden êptischen des gotzhus Zurich¹ kunden allen, die disen brief sêhend oder || ho^erend lesen, das für vns kam Mangold der Satler burger Zurich vnd vfgab ledeklich an vnser || hand sin gůt ze V^esinkon², giltet acht stuk Zurich messes, mit allem recht vnd ehaftigi, so der zů || geho^eret, vnd bat vns lihen den erberen vnd geischlichen vrowen der .. êptischen vnd dem conuent des klosters ze Wrmbsbach³ in Kostentzer bistum, dur got vnd das si ovch emphangen hant Gůten sine tochter in ir conuent ze einer kloster vrowen vnd pfrůnde gegeben, das si da bi inen^a) gotte diene, ze rechtem erbe, wan ez sin erbe was von vnserm gotzhus vmb einenen^b) Zuricher pfenning. Wir erhorten dise bêtte vnd lihen das vorseite gůt mit allem recht vnd ehaftigi, so der zů geho^eret, den vorschriben erberen vnd geischlichen vrowen der .. êptischen vnd^c) dem conuent ze Wrmbsbach ze rechtem erbe vmb zwene Zuricher pfenninge vns vnd vnserm gotzhus jarlich ze gebenne ze des heiligen kruzes tuld ze herbest. Ovch hat Mangold Satler der vorgenande gelobt vnd bindet sin erben dar zů an disem briefe, der erberer vnd geischlicher vrowen der .. êptischen vnd dem conuent ze Wrmbsbach des vorseiten gůttes wêrn ze sinne^d) fur recht erbe von vnserm gotzhus vmb den vorschriben zins nach rechte, swa sis bedurfen an geischlichem vnd an wêltlichem gerichte. Vnd das dis alles war si vnd veste belibe vnd dur beider teil bêtte, so geben wir disen brief besigelt mit vnserm ingesigel ze einem waren vrkund offenlich. Dis geschach vnd wart dirre brief gegeben an dem nachsten sunnentag nach des heiligen kruzes tuld ze herbest, do von gottes geburt waren druzehenhundert jar, in dem sechszêhenden jare danach, da ze gegen waren meister V^olrich der kuster Zurich⁴, her Chůnrad von sant Gallen vnser kapplan⁵, her Chůnrad Saler, meister Johans der Satler burger Zurich, Brůdolf^b) der Meijer vnd ander erbere lute vnd gezuge genuge.

Source Fulltext: Chartularium Sangallense V, Nr. 2981, S. 312-313.