Wir grauff Huge von Bregentze¹ kunden vnd veriechen allen den, die disen gegenwirtigen brief sechent ald horent lesen, das wir mit dem ersamen hern in gott abt Hainrich des gotzhuse von sant Gallen² vnd mit dem gotzhuse lieplich vnd gutlich bericht sind vmbe allen den schaden, den vnnser vatter grauff V^olrich³ ie gewan alder vns ie gewunnen vntz an disen huttigen tage von des gotzhus wegen von sant Gallen mit kainer schlacht sache, vnd verzihen vns aller der ansprach, die wir vnd vnnser vatter an das gotzhuse hetton ald hon mochten mit kainer schlacht sache. Wa wir och von dem gotzhuse kainen brief hant ald hienach vinden vmb kain schlacht schaden, den wir vntz an disen huttigen tage von des gotzhuse wegen ie gewunen, den vernůtten wir vnd verunerwinden mit disem^a) gegenwirtigen brief, won allain die brief, die vns^b) von dem gotzhuse hant vmbe ain pfande ze Willer⁴ vnd ze Schaittege⁵. Vnd darum haben wir enpfangen von des gotzhus wegen von dem furnämen ritter her Johannsen von Blumnegge⁶ hundert marcke lo^etiges silbers Costentzer gewa^egeß, die wir in vnnsern nutze habent gekert, vnd zwaintzig vnd hundert marcke sint vns geschlagen von vnnserm hern apt Hainrich des gotzhuse ze sant Gallen vffain gut ze Willer vnd ze Schaittege, du vnnser recht pfande von dem gotzhus sint. Das aber dis vorgeschriben dinge wa^vr sig, craft habe vnd sta^ette belibe, so geben wir gra^vff Huge von Bregentz vnnserm ersamen hern apt Hainrichen des gotzhus ze sant Gallen vnd dem gotzhuse disen brief besigelt mit vnnserm insigel ze ainem ewigen vnd warem vrkunde der dinge, die hie vor geschriben stond. Dis geschach vnd ward dirre brief geben ze sant Gallen, do man zalt von gottes gepurte druzehenhundert jar, darnach in dem sechszechenden jar, an sant Gregorien tage, da die gezuge zegegen warent, der edel herre grauff Rudolff der bropste von Cure⁷, grauff Huge sines brůders sun von Muntforte⁸, her Wilhelm von Ende⁹, her Albrecht von Clingenberg¹⁰, her Hainrich von Randegge¹¹, her Rudolff der kirchherre von Roschach¹², her Rudolff sin bruder der ritter¹³, her Eglolff von Rosenberge¹⁴, her Cunrat der Schencke¹⁵, her Ludwig von Brachsperge¹⁶, her Cunrat von Schonnenstain¹⁷, her Oswalt von Schowenberge¹⁸, her Cunrat der vogte von Sumerowe¹⁹, H. der Ome²⁰, V^olrich Meldeli²¹, Hainrich Meldeli²², Hainrich sin brůder²³, Johanse der Spisar vnd ander ersamer luten vil.

Source Fulltext: Chartularium Sangallense V, Nr. 2966, S. 301-302.