Ich Willehalme von Ênne^a)1 ain frie vnd ritter dv^on kvnt allen den, die disen gegenwurtigen brieph an sehent, lêsent || alder ho^errent lesen, vnd furgich des o^ephenlich an disem selben brieph, das mir vnd allen minen erben mit gůtem willen || vnd betrahtunge der ergirge hêrre Hainrich von gottes genaden âpte² des gotzehusse von sant Gallen geluhen hât || ze ainem reht burgesesse die burch ze Grimenstain³ vnd ho^euerowe, du dar zů ho^erret, du gerait ist vnd geschetzet fur phvnph phvnt geltes vnd sêhze phvnt phenninge geltes vsser dem ho^eph ze Ho^este⁴, der da gelegen ist ênnont des Rines, in allem dem dinge vnd reht, als Hainrich von Grimenstain⁵ vnd alle sin forderen es och da hêre gehapte hânt von dem vorgenanten gotzehvsse von sant Gallen. Ich Willehalme von Enne der vorgenant furgich och ophenlich an disem selben brieph fur mich vnd fur alle min erben, das ich mit gůten druwen gelopt ha^ene vnd ze den hailigen gesworne, das ich vnd alle min erben den vorgenanten hêrren vnd âpte vnd alle sine nachekomen, die den sint, in die vorgenanten burch ze Grinmenstain^b) in la^essen sol, swên er sin zů sinen no^eten bedarphe, in allem dem dinge vnd reht, als Hainrich von Grinmenstain^b) der vorgenant vnd sine vorderne da hêre getâne hânt, vnd in allem dem dinge vnd reht, als ein burcheman sinem hêrren dv^on sol von sinem bvrchesesse. Vnd das das wa^ere sie vnd vnwandelber belibe, darumbe so hênche ich Willehalme der vorgenant von Ênne minen insigel an disen brieph ze ainem wa^eren vrkvnde vnd vêstunge aller der dinge vnd gedinge, so da vor gescriben stât. Dir brieph wart gegeben, do mân zalt von gottes geburt drutzehen hvndert iâre, dar nach in dem phvnphtzehenden iâr, an dem nehsten ma^entage vor der hailigen vffevârt vnsers hêrre.

Source Fulltext: Chartularium Sangallense V, Nr. 2926, S. 278.