Wir grafe Friderich von Toggenburg¹ phleger ze Gru^eningen² von der edlen hochgelopten herren wegen vnser sunder herron der her||zogen von O^esterrich vnd von Stir kunden vnd veriechen offenlich an disem briefe allen dien, die disen gegenwurtigen brief sehent oder ho^erent le||sen, dc die von Widriswil³, die in de ampt ze Gru^eningen ho^erent, der phleger ich bin, alle die, die an der wisen teil hetten oder gemeinde, du in || den Egelse⁴ stozzet vnd dar an, vnd die da vffe ir rossen⁵ macheton ald in selber da kein rechtung gaben ald iachen, de su da rossen soltin von keinem rechte, ald sich keiner rechtung keins vischens an nament in dem vorgenanden sewe, de wider dien erwirdigen herren in gotte des .. comendurs, des schaffeners vnd alles des conuentes des huses ze Bůbinkon⁶ sant Johannes ordens willen vnd vrlob beschach, wand der egenande Egelse ir eingenlich ist vnd was, vnd da von so wc entzwischen disen beiden teilen langwiriger krieg gewesen, de su einander kumberten mit geistlichem vnd weltlichem gerichte, vnd dar vmb, de su hinnanfür iemer des kumbers fri beliben, do kamen die vorgenanden lute von Widriswil mit vnser^a) wissend vnd willen vnd vnder vns des williklich vnd gerne vberein mit tegdingen vnd mit rate mit dien vorgenanden erwirdigen herren in gotte dem comendur, dem schafner vnd dem conuente des huses ze Bůbinkon, de su sich gegen in vnd mit vnser hant enzigen vnd vfgaben alle die rechtunge ze rossenne in dem egenanden sewe ald ze vischen in dem sewe, der su in selber vnz dar iachen ald vnz dar ie gewunnen, vnd sund su noch ir nakomen de^b) egenanden herren da mit niemer mer bekumbern noch kein weg mit der sache beswern. Vnd de dis alles war si vnd stete belibe nu vnd her nach bi vns vnd vnsern nakomen, so geben wir der vorgenande graue Frid. von Toggenburg phleger ze Gru^eningen disen brief besigelt offenlich dur bette beider teile mit vnserem ingesigel ze einem geweren vrkunde aller dir vorgeschribener dinge. Dis beschach^d) nid Widriswil vf dem Bůle⁷, do ze gegen waren vnser amptlute, Růdolf von Menidorf⁸, Růdolf Struzo vnd aber Růd. von Landoltzaker⁹, Heinr. der Tanner von Burge¹⁰, Růdolf der Zehender von Berlinkon¹¹, Berchtolt der Schultheizo von Ru^edingshusen¹², Berchtold Fleder von Adlatzhusen¹³ vnd Růd. Mangolt, Heinr. von Egelse vnd^a) ander erber lute genůge. Dir brief wart gegeben ze Gru^eningen vf der burg, do man zalte von gottes geburte druzehenhundert iar vnd dar nach in dem vierzehenden iare, an dem nechsten sunnuntage nach sant Michels tage.

Source Fulltext: Chartularium Sangallense V, Nr. 2903, S. 264.