Omnibus Christi fidelibus presencium inspectoribus Hainricus dei gratia abbas¹ totusque conventus monasterii sancti Galli ordinis sancti Benedicti Constanciensis dyocesis salutem cum noticia subscriptorum. Ne res geste aliquam valeant inposterum recipere dubitacionem, expedit ipsa litterali serie memorie commendari. Noverint igitur universi tam posteri quam presentes, quod cum nos nostrumque mona-sterium essemus debitis quampluribus onerati, de quorum onere sine rerum immobilium distractione possemus nullatenus relevari, inito consilio et quampluries deliberacione prehabita diligenti, unanimi consensu nostri omnium accedente, a discretis viris Hugone dicto Volin et Stephano et Johanne fratribus fratruelibus iam dicti Hugonis sedecim libras denariorum monete usualis recepimus et nos recepisse presentibus profitemur et in usus notorios nostri monasterii convertisse, scilicet in exhoneracionem debiti prenotati, et pro dicta pecunia possessionem dictam Waldi², quam predicti Hugo, Stephanus et Johannes hactenus possidebant nomine feodi, quod vulgo dicitur erblehen et de qua annis singulis specialiter abbacie nostri monasterii quindecim solidos monete prescipte census nomine exsolvebant, a iam dicto censu et ab omnibus serviciis, quocumque censeantur nomine, nobis nostroque monasterio de ipsa iure debitis vel^a) eciam factis de conswetudine usque ad hoc tempus, exoneravimus et liberam esse fecimus. Nos vero dictus abbas recepta resignacione dicte possessionis reddite inmunis ab omnibus serviciis debitis nobis nostroque monasterio de eadem ipsam nomine nostri monasterii et omnibus nostris confratribus presentibus et ad hoc consensum expressum adhibentibus predictis Hugoni, Stephano et Johanni contulimus nomine iusti feodi, quod vulgariter dicitur ain rehtes lehen, volentes, ut ipsi suique heredes vel illi, in quos dicta possessio per eos tytulo vendicionis transferatur, ipsam possideant, habeant nomine feodi iusti perpetuo sine cuiuslibet obice contradictionis pacifice et quiete, adhibita in premissis verborum et gestuum sollempnitate, que in talibus contractibus de facto vel de iure scripto debet vel consweverat adhiberi. Volumus eciam, ut omnia prescripta eam vim habeant, ac si per nos in iudicio forent facta, renunciantes in predictis omnibus et singulis omni iuris privati vel communis, canonici vel civilis auxilio, doli mali et restitucionis in integrum, excepcionibus, litteris quibuslibet a sede apostolica vel aliunde inpetratis seu eciam inpetrandis necnon occasioni cuiusvis tam in genere quam in specie, cuius pretextu omnia, que premissa sunt, vel aliquod ipsorum per nos vel nostros successores nunc vel inposterum posset aliqualiter infirmari. Et in huius rei evidenciam sepe dictis Hugoni, Stephano et Johanni tradimus presentes nostr sigillorum munimine consignatas. Acta sunt hec et facta apud sanctum Gallum, anno domini millesimo tricentesimo terciodecimo, quinto kl. marcii, indictione undecima, presentibus testibus infra scriptis, domino Wernhero sacerdote rectore ecclesie in Hennow³, V^olrico de Meldeg⁴, Gerwico ministro oppidi sancti Galli⁵, Cůnrado dicto Kuchimaister⁶, Johanne dicto Fuller, Egelolfo, Jacobo et Cůnrado dictis Blarer, Cristano et Cůnrado dictis Volin, Johanne Arnoldo et aliis quampluribus fidedignis.

Source Fulltext: Chartularium Sangallense V, Nr. 2850, S. 238-239.