Omnibus Christi fidelibus presens scriptum intuentibus Hainricus dei gratia abbas¹ totumque capitulum seu conventus || monasterii sancti Galli ordinis sancti Benedicti Constanciensis dyocesis salutem cum noticia subscriptorum. Ne ea, que geruntur || in tempore, oblivionis caligine obfuscentur, expedit ipsa litterarum testimonio perhennari. Noverint igitur tam posteri || quam presentes, quod nos intuentes magna et eximia dampna dilectis nobis civibus oppidi nostri in Wila² per incendium illata pietate moti, qua ipsis tamquam fidelibus nostris tenemur seu eciam obligati sumus, cupiebamus eos a dictis dampnis aliquantulum relevare. Quare inito consilio et unanimi consensu nostri omnium adhibito predictos nostros cives absolvimus et eos presentibus profitemur absolutos per nos ab omnibus stüris seu exactionibus, que vulgariter dicuntur sturan, nobis nostroque monasterio ab eisdem civibus debitis usque ad festum beati Galli proximo venturum et deinde per quatuor annos proxime et continue succedentes. Hec autem gratia facta est dictis nostris civibus a nobis pro nobis nostrisque successoribus nomine dicti nostri monasterii tamquam utilis et proficua||
nobis, ne aliquos hominum dicti nostri oppidi propter paupertatem ab ipso oppido discedere contingeret, quod sine dispendio magno nostri nostrique monasterii fieri non valeret. Et in huius rei evidenciam firmiorem sepedictis nostris civibus hanc cartulam donavimus nostri sigillorum karactere consignatam. Datum apud sanctum Gallum, anno domini M°.CCC°.XII, VI° kl. decembris, indictione XI^a.

Source Fulltext: Chartularium Sangallense V, Nr. 2833, S. 225.