Wir Friderich von Friberg¹ lantrihter von dez Ro^emeschen kûnigez H.² II gewalte in dem Rintale in der Birsse tu^egint kunt allen, die disen brief an||sehent lesent oder ho^erent lesen, daz Merbot Karle burger ze Lindowe³ kam || fur lantgerihte ze Vischerhusen⁴ vnde clagete da ze Eberharte dem Helte burgere^a) ze Rinegge⁵, ze Herman, ze Bertschin, ze V^olriche den Bensten vnde ze der geswistergite, vnde clagete ze den von der stette wegen von Lindowe vnde von allez dez landez wegen, daz si nament verschatz vf dem Rine, der dem lande vngewonlichen wa^ere vnde och niht reht wa^ere, darumbe wart vor lantgerihte ertailet Merboten dem vorgenanten an der stette von Lindowe stat vnde an dez landez stat, mohte er furbringen alse reht wa^ere, daz si niht rehtez hettint ze dem verschatze, daz er dez genusse, daz brahte er fur, da si baidenthalb stůndent vor gerihte mit ir fursprechen, daz weder Eberhart der Helt noch die Benste noch nieman andere vf dem Rin enhainen verschatz nemen sol von dehainer slahte gůte wan allaine von trukenem gůte gebundem, daz vber die berge kumet oder da hin gat den Rin vf aide abe, von swelchem lande der ist, der sol geben ie von dem some ainen pfenning Costentzer munsse vnde anderz niht. Daz brahte er fur mit briefen⁶ vnde mit der kuntschaft, darumbe wart Merbotten vnde dem lande ertailet, sit daz der Rin wa^ere dez richez frigiv^o strasse vnde er daz furbrahte, alse da vor geschriben ist, daz och nieman vf dem Rine furbaz nemen sol wan von trukenem gůte, alse da vor geschriben stat. Der brief wart geben vor lantgerihte ze Vischerhusen in dem jare, do div^o zale waz von Cristes geburte driv^ozehen hundert jare in dem ainliften jare, an sante Peters abende dez botten, indic. VIIII^a.

Source Fulltext: Chartularium Sangallense V, Nr. 2783, S. 200.