Allen die disen brief sehent alt ho^erent lesen, kvnden wir graue Růdolf von Habspurch¹, dc || Peter von Rambach² burger ze Raprechtswile³, der rechter voget vnt phleger ist Elizabethen vnt Margareten Jacobes seligen tochteren von Rambach⁴ sines brůders, sich || enzigen het ze der selben tochteren weg vnt mit vnser hant an vnsers herren aptes Johans von goz genaden von Einsidellen⁵ hant alles des rechtes, ob siv dekeines hatten an dem sewe, der da heisset Walase vnt lît zewischen Frienbach⁶, vnt hant die tochteren vnt o^vch Peter von Rambach sich enzigen aller der ansprach, so siv an den vorgenanden Walase iemer mo^echten han. O^vch het her V^olrich Giel ritter von Glatburch⁷ vnt Peter von Rambach der vorgenande gelopt, so Jacob von Rambach des vorgenanden Jacobs seligen svn ze lande komet, dc er inrent einem manot dem nechsten sich an vnsers herren des vorgenanden aptes hant^a) enzihe alles des rechtes, ob er dekeines het, vnt der ansprahe, so er mo^echte han an den vorgenanden Walase, vnt svn de endelich schaffen, vnt^b) vmb de vorgeschriben so het Peter von Rambach ze der vorgenanden tochteren vnt Jacobs wegen enphangen von vnserem herren dem apte von Einsidellen vier march silbers Zurich gewicht vnt o^vch de ze der tochteren vnt Jacobs nuz bekert. Vnt ze einem offennen vrkvnde des vorgeschriben durch die bette Peters von Rambach vnt der tochteren vnt hern V^olr. Giels geben wir vnserem herren dem apte disen brief besigelt mit vnserem ingesigel. Diz geschach Zurich vnt wart och dir brief gegeben, do man von gottes geburt zalte zwelfhundert vnt nunzeg jar vnt dar nach in dem cehendem jare an der mitken in der osterwuchen.

Source Fulltext: Chartularium Sangallense V, Nr. 2503, S. 10-11.