Ich^a) V^ollrich Habch stattamman ze Costentz¹ kúnd vnd vergich des offenlich mit disem brief allen, die in ansehent oder ho^erent lesen, das ich an des riches offenen || strâsse in der statt ze Costentz an disem hútigen tag, als dirre brief geben ist, offenlich ze gericht sass, do kam fúr mich der wolbeschaiden manne Eglolf der Blarrer burger || ze Costentz vnd offnot da mit sinem fúrsprechen vnd sprach, das er von dem wolbeschaiden manne Hugen dem Schůlmaister burger ze sant Gallen enphangen hab funffzig phvnt || gůter vnd ga^eber phenning Costentzer mv´nsse vnd der er och gar vnd ga^entzlich von im bericht vnd gewert wa^ere vnd die er och in sinen redelichen nvtz geben vnd bekert hette vnd das er im vnd allen sinen erben vnd na^vchkomen fúr sich vnd alle sin erben vmb die selben phenning hab ze koffent geben recht vnd redelich vnd aines besta^eten ko^vffs den hof ze Smitten², der entzwúschent Albisperg³ vnd Stainibrunnen⁴ gelegen ist, fúr recht aygen, wan das ja^erlichs der zehent dar vss ga^vn sol, vnd batt im ervaren an ainer vrtail, wie er den selben hof also mit hus vnd hofraiti mit holtz mit veld mit aker mit wisan mit wasen mit zwi mit wvnn mit waid mit wegen mit stegen mit abwegen mit wasser vnd mit wasserlaitinen mit gebuwtem ald vngebuwtem wissendes ald vnwissendes mit nv´tzen mit frúchten mit zins vnd gelt vnd mit allen andren rechten vnd zů geho^erden, als der selb hof an in komen vnd bra^vcht ist vnd als er in vntz her besessen vnd genossen hett, mit allem recht mit aller zůgeho^erd ze V^olrich Ru^edgers hand an siner statt vnd in sinem namen, wan er nit da ze gegen wa^ere vor gericht, bringen vnd vertigen solt, als recht wa^er vnd das kraft hette vnd da mit der selb Hug Schůlmaister vnd alle sin erben vnd na^vchkomen nv vnd hie na^vch besorget wa^erint. Da ward ertailt mit rechter gesamnoter vrtail, das der selb Eglolf der Blarer dar stu^ende vnd da offenlich vor gericht den vorgenanten hof mit allem recht vnd mit aller zů geho^erde vnd a^ellú dú recht, so er vntz her dar an gehebt ha^vt, dem vorgenanten V^olrichen Ru^edger an sin hant an des obgenanten Hugen Schůlmaisters statt vnd in sinem namen vff ga^ebe vnd sich da mit fúr sich vnd alle sin erben gen dem selben Hugen Schůlmaister vnd gen allen sinen erben vnd na^vchkomen an dem selben hof vnd was dar zů geho^ert entzig aller aigenschaft aller lehenschaft aller vordrung aller anspra^vch alles schirmes alles vszuges vnd alles rechtes gaistlich vnd weltlich gerichtes, da mit er ald sin erben ald ieman andre von ir wegen den selben hof vnd was dar zů geho^ert nv ald her na^vch fúr aigen oder fúr lechen kv´ndint ald mo^echtint an gesprechen in dekaine wise, es wa^er mit gericht ald a^vne gericht gaistlichem oder weltlichem, vnd o^vch da bi lobti, dis ko^vffes vnd vertegung des selben hofs vnd was dar zů geho^ert recht wer ze sint fúr recht aigen er vnd alle sin erben des selben Hugen Schůlmaisters vnd aller siner erben vnd na^vchkomen na^vch recht vnd gewonhait der statt ze Costentz a^vn alle geva^erde, wenne er das ta^ett vnd vollefu^ert wurde, das es danne vmb die sach wol durch recht kraft vnd macht hette nv vnd her na^vch. Dis vertigen verzihen vnd vffgeben vnd o^vch die gelúbde vollefůrt da der vorgenant Eglolf der Blarer offenlich vor gericht mit allen den worten werchen ra^eten vnd geta^eten, so dar zů hort vnd nottúrftig was vnd als im och offenlich vor gericht mit rechter gesamnoter vrtail ertailt ward. Vnd ze warem vrkúnde gebint wir die vorgenanten V^olrich der Habch stattamman vnd Eglolf der Blarrer burger ze Costentz v´nserú insigel an disen brief. Der ist ze Costentz geben, do man von Cristes gebúrt zalt drúzehenhvndert ja^vr, dar nach in dem achtzigosten ja^vr, an sant Lucien tag der hailigen maget.

Source Fulltext: Chartularium Sangallense IX, Nr. 5818, S. 476-477.